Президент Қасым-Жомарт Тоқаев China Communications Construction Company (CCCC) президенті Чжан Биньнаньмен кездесіп, Қазақстандағы ірі инфрақұрылымдық және энергетикалық жобаларды талқылады. Күн тәртібінде жаңа теміржол, Каспийдегі теңіз инфрақұрылымы және елдегі алғашқы гидрожинақтаушы электр станциясының құрылысы болды, деп хабарлайды Tech-news.
Кездесу барысында Мемлекет басшысы CCCC компаниясын Қазақстандағы ірі инфрақұрылымдық жобаларды жүзеге асырып келе жатқан сенімді серіктес ретінде бағалады.
Президент Бақты – Аягөз теміржолының стратегиялық маңызын ерекше атап өтті. Жаңа теміржол желісі Қазақстан мен Қытай арасындағы жүк тасымалының көлемін ұлғайтып, халықаралық көлік дәліздерінің өткізу қабілетін арттыруға мүмкіндік береді.
Тараптар Каспий теңізінің табанын тереңдету жұмыстарын жүргізетін бірлескен кәсіпорын құру мәселесін де талқылады. Жоба Каспий өңірінде қауіпсіз кеме қатынасын қамтамасыз ететін және теңіз инфрақұрылымына қызмет көрсететін өңірлік орталық қалыптастыруға бағытталған.
Кездесуде энергетика саласындағы ынтымақтастыққа да ерекше назар аударылды. Тоқаев Қазақстандағы алғашқы гидрожинақтаушы электр станциясын бірлесіп жобалау туралы келісімге қол қойылғанын құптады.
Жоспарға сәйкес, қуаттылығы 600 МВт болатын станция Алматы облысындағы Қарғалы өзенінде салынады. Жобаны CCCC құрамына кіретін China International Water & Electric Corporation компаниясы жүзеге асырады.
Президенттің айтуынша, жаңа энергетикалық нысан ұлттық электр жүйесінің тұрақтылығын арттырып, энергияны тиімді сақтау мен тұтыну теңгерімін жақсартуға ықпал етеді.
