Қытайдың Жоғарғы Халық Соты жасанды интеллектке қатысты дауларды қараудың арнайы ережелерін жариялады. Жаңа құжат AI технологияларын дамыту мен азаматтардың құқықтарын, ұлттық қауіпсіздік пен қоғамдық тәртіпті қорғау арасындағы тепе-теңдікті қамтамасыз етуге бағытталған, деп хабарлайды Tech-news.
«Жасанды интеллектке қатысты дауларды шешу туралы пікірлер» деп аталатын құжат бес бөлім мен 24 баптан тұрады. Бұл — Қытайдың ең жоғары сот органы қабылдаған AI саласындағы сот істеріне арналған алғашқы мамандандырылған ережелер жиынтығы.
Жоғарғы Халық Соты төрағасының орынбасары Тао Кайюаньның айтуынша, жаңа нормалар технологиялық инновациялардың қарқынды дамуы жағдайында құқықтық реттеуді күшейту қажеттілігінен туындаған.
Құжатта адамның келісімінсіз виртуалды бейне жасауға, бет-әлпетін ауыстыруға және дауысын синтездеуге қатысты нақты шектеулер енгізілген. Сонымен қатар қайтыс болған адамдардың жеке деректерін пайдалануға да ерекше талаптар қойылады.
Жаңа ережелер автономды көліктерге де қатысты. Егер апат көліктің жобалауындағы немесе өндірісіндегі ақаудан болса, жауапкершілік өндірушіге немесе сатушыға жүктелуі мүмкін. Бұл талап жүргізушіге көмек көрсету жүйелері қолданылатын көліктерге де қатысты.
Соттарға генеративті AI көмегімен жасалған немесе өзгертілген жалған дәлелдемелерге ерекше назар аудару тапсырылды. Басқаша айтқанда, жасанды интеллектті сотты адастыру немесе дәлелдемелерді бұрмалау үшін пайдалануға қатаң тыйым салынады.
Автопилот қосулы тұрған көліктерге қатысты қылмыстық жауапкершілік те жеке қарастырылған. Егер жүргізуші бақылау жүйесін әдейі айналып өтсе, көлік жүйесіне заңсыз араласса немесе автопилотты пайдаланып алаяқтық жасаса және оның салдарынан апат орын алса, мұндай әрекеттер қылмыстық іс ретінде қарастырылуы мүмкін.
Қытайдың жаңа ережелері AI технологиялары кеңінен қолданылып жатқан кезеңде туындайтын құқықтық дауларды реттеуге бағытталған. Құжат әсіресе deepfake, генеративті AI және автономды көлік сияқты технологиялардың азаматтардың құқықтары мен қауіпсіздігіне әсерін заң аясында бақылауға мүмкіндік береді.
