Google YouTube платформасына әлеуметтік желілерге тән функцияларды қосуды қарастырып жатыр. Android қосымшасының кодынан Tamba деп аталатын жаңа жоба табылды. Ол жеке хабарламалар, топтық чаттар, жазылушылар және фото мен видео алмасу мүмкіндіктерін қамтуы мүмкін, деп хабарлайды Tech-news.
Жаңа жобаны Android Authority басылымы YouTube-тың Android жүйесіне арналған 21.44.534 нұсқасын зерттеу кезінде анықтаған. Қосымша кодынан com.google.android.youtube.sandbox атауымен белгіленген жеке пакет, Tamba жобасының логотипі және оған қатысты 38 арнайы белгіше табылған.
Олардың арасында іздеу, камера, чат, кіріс хабарламалар және контент жариялауға арналған функциялардың белгішелері бар. Бұл жобаның YouTube-тағы дәстүрлі видео көру мүмкіндіктерінен әлдеқайда кең болатынын аңғартады.
Кодтағы деректерге сүйенсек, Tamba пайдаланушылары бір-біріне жазылып, жазылу туралы сұрау жібере алады. Сонымен қатар жеке аккаунтты жабық ету, жеке және топтық чаттар құру, фотосуреттер мен видеолармен бөлісу мүмкіндіктері қарастырылған. Тіпті дауыстық хабарламалар жіберу функциясы да пайда болуы ықтимал.
Осылайша, Google YouTube-тың ауқымды аудиториясы мен видеоконтент қорын Instagram секілді әлеуметтік платформаларға тән коммуникация құралдарымен біріктіруді көздеуі мүмкін.
Дегенмен Tamba-ның жеке қосымша ретінде шығатыны немесе YouTube ішіндегі эксперименттік жоба екені әзірге белгісіз. Мұны кодтағы sandbox атауы да аңғартады. Бұған қоса, табылған белгішелердің бір бөлігі эксперименттік функциялар ретінде белгіленген. Сондықтан жобаның нақты мүмкіндіктері мен іске қосылу мерзімі туралы әзірге ресми ақпарат жоқ.
