Қазақстан қаржы нарығы ашық банкинг моделінен кеңірек — ашық қаржыландыру жүйесіне көшуді жоспарлап отыр. Бұл тәсіл банк, сақтандыру, микроқаржы және бағалы қағаздар нарығындағы қызметтерді бір цифрлық ортаға біріктіріп, клиентке қаржы өнімдерін бір жерден таңдауға мүмкіндік бермек, деп хабарлайды Tech-news.
Бұл туралы Қаржы нарығын реттеу және дамыту агенттігінің төрағасы Мадина Әбілқасымова Орталық Азия FinTech саммитінде айтты.
Қазір Қазақстанда қаржы нарығының негізгі бағыттары бір-бірінен бөлек дамып келеді. Мысалы, банк қызметі, сақтандыру, микроқаржыландыру және бағалы қағаздар нарығының әрқайсысының өз платформалары мен сервистері бар.
Ашық қаржыландырудың мақсаты — осы қызметтерді клиенттің айналасына біріктіру. Яғни пайдаланушы әртүрлі қаржы өнімдерін бір платформадан немесе бір қосымшадан көріп, салыстырып, өзіне қолайлы нұсқаны таңдай алады.
Мұндай модельде қаржы ұйымдары клиент үшін тікелей бәсекеге түседі. Компаниялар пайдаланушының қажеттілігіне сәйкес ең тиімді өнімді ұсынуға ұмтылады.
Әбілқасымованың айтуынша, Қазақстанда ашық қаржыландыру әзірге кең тарамаған. Соған қарамастан, ол қаржы секторын цифрландырудың жаңа стратегиясындағы негізгі бағыттардың біріне айналуы мүмкін.
Мысал ретінде реттеуші сақтандыру нарығын атады. Қазір Қазақстанда әртүрлі сақтандыру өнімдерін бір жерден салыстырып, таңдауға мүмкіндік беретін бірыңғай цифрлық платформа жоқ. Осындай нарық құру қаржы секторын дамыту бағдарламасы мен жаңа заң жобасында қарастырылып жатыр.
Ашық қаржыландырудың тағы бір мақсаты — қаржы қызметтерін алудағы кедергілерді азайту. Бұл ретте жүйе ең алдымен қаржы ұйымдарының емес, тұтынушылардың қажеттіліктеріне бейімделуі керек.
Сонымен бірге жаңа қаржы технологияларын реттеу кезінде технологиялық бейтараптық сақталмақ. Реттеуші үшін бәсекелестікті дамыту, киберқауіпсіздік пен жеке деректерді қорғау, сондай-ақ инвесторлар мен қаржы қызметтерін тұтынушылардың құқықтарын сақтау маңызды.
Әбілқасымова жаңа бағалы қағаздар нарығы туралы заң да осы бағытты ескеретінін айтты. Құжатта Қазақстандағы реттеу тәсілдерін Астана халықаралық қаржы орталығының талаптарымен үйлестіру қарастырылған.
Бұл екі реттеу режимінде жұмыс істейтін инвесторлар мен эмитенттер үшін барынша салыстырмалы жағдай жасауға мүмкіндік беруі тиіс.
