Қазақстанда 100 млн теңгеден асатын бірқатар бюджеттік шығындар цифрлық теңге арқылы қаржыландырылады. Ұлттық банк төрағасының орынбасары Бинур Жаленовтің айтуынша, цифрлық валютаны қолдану мемлекеттік қаражаттың қайда жұмсалатынын бақылауға мүмкіндік береді, деп хабарлайды Tech-news.
Жаленов бұл туралы Орталық Азия қаржы технологиялары саммитінде мәлімдеді.
Цифрлық теңгенің негізгі ерекшеліктерінің бірі — оның жұмсалу шарттарын алдын ала бағдарламалау мүмкіндігі. Мысалы, мемлекет белгілі бір қаражаттың тек нақты тауарды сатып алуға немесе белгілі бір жобаны қаржыландыруға жұмсалуын белгілей алады.
Бұл тәсіл бюджет қаражатының мақсатсыз пайдаланылу қаупін азайтуға мүмкіндік береді.
Жыл басында Қаржы министрі цифрлық теңге қолданылатын бюджеттік бағыттарды бекітетін тиісті бұйрыққа қол қойған. Олардың қатарында құрылыс, дәрі-дәрмек сатып алу және басқа да салалар бар.
100 млн теңгеден асатын сомалар бойынша цифрлық теңгені пайдалану міндетті. Мұндай операцияларда министрліктер, әкімдіктер және басқа мемлекеттік мекемелер қаражат алушы тарап ретінде әрекет ете алады.
Қазір цифрлық теңге инфрақұрылымдық жобаларда да қолданылып жатыр. Мысалы, Көлік министрлігімен бірлескен жоба аясында 33 жаңа нысанның құрылысын цифрлық теңге арқылы қаржыландыру жоспарланған.
Бұдан бөлек, жыл соңына дейін фармацевтикалық препараттарды сатып алуға цифрлық теңгені пайдалану бойынша пилоттық жоба іске қосылмақ.
Ұлттық банк өкілінің айтуынша, цифрлық теңге теміржол және газ салаларындағы инфрақұрылымдық жобаларды қаржыландыруда да қолданылып келеді.
Қазір Қазақстанда цифрлық теңгеге байланысты 50-ден астам белсенді жоба бар. Ұлттық банк пен үкімет оны мемлекеттік шығындарда қолдану аясын одан әрі кеңейтуді жоспарлап отыр.
