Қазақстанда жасанды интеллект саласында жұмыс істейтін мамандар мен командаларға арналған жабық менторлық бағдарламаға іріктеу жарияланды. Қатысушылар Кай-Фу Ли бастаған 01.AI сарапшыларынан тәлім алып, өздерінің AI-жобаларын дамытуға мүмкіндік алады. Өтінімдер 24 қыркүйекке дейін қабылданады, деп хабарлайды Tech-news.
Бағдарламаға кімдер қатыса алады?
Q.AI, Astana Hub және Alem.ai Foundation Қазақстан Республикасының Жасанды интеллект және цифрлық даму министрлігімен бірлесіп, жаңа когорттық менторлық бағдарламаны іске қосады.
Алғашқы легі alem.ai халықаралық орталығында Q.AI зерттеу зертханасының ашылуы аясында басталады. Конкурстық іріктеу нәтижесінде 20–25 қатысушыдан тұратын когорта құрылады.
Бағдарлама AI саласында нақты жобасын, өнімін немесе технологиялық шешімін дамытып жүрген мамандар мен командаларға арналған. Қатысушылар шағын топтарға бөлініп, технологиялық және бизнес-міндеттерді шешумен айналысады.
Іріктеуге мына санаттағы үміткерлер қатыса алады:
- Мемлекеттік қызметшілер мен ұлттық компаниялардың өкілдері;
- Tomorrow School студенттері;
- AI/ML мамандары мен инженерлер;
- AI-кәсіпкерлер және AI-стартаптардың негізін қалаушылары.
Конкурста ағылшын тілін меңгеру деңгейі, AI саласындағы бэкграунд, жобалардағы тәжірибе және ауқымды AI-шешімдерді дамытуға деген мотивация ескеріледі.
Менторлық бағдарламаның негізгі сарапшыларының бірі — Кай-Фу Ли. Ол Sinovation Ventures және 01.AI компанияларының негізін қалаушы, AI индустриясындағы танымал кәсіпкерлердің бірі.
Бұған дейін ол Google China компаниясын басқарған және Microsoft Research Asia зерттеу орталығын құрған. Сондай-ақ AI Superpowers кітабының авторы.
01.AI компаниясы Q.AI-дың технологиялық серіктесі саналады.
Бағдарлама аясында қатысушылар 01.AI сарапшыларының топтық менторлығына, практикалық воркшоптарға және тұрақты сессияларға қатысады. Негізгі тақырыптар:
- Frontier AI — жасанды интеллекттің озық модельдері мен технологиялары;
- Әртүрлі салалардың AI арқылы трансформациясы;
- Технологиялық кәсіпкерлік;
- Жоғары әсері бар AI-шешімдерді әзірлеу.
Кай-Фу Лимен де мерзімді топтық семинарлар ұйымдастырылады. Онда AI дамуының негізгі үрдістері мен ауқымды технологиялық өнімдер құру мүмкіндіктері талқыланады.
Алғашқы когортаның құрамы мен конкурстық іріктеу нәтижелері 2 қазанда AI & Digital Bridge 2026 аясында жарияланады.
Бағдарлама Қазақстандағы AI мамандары мен кәсіпкерлерінің қауымдастығын дамытуға, халықаралық сараптамаға қолжетімділікті кеңейтуге және 01.AI мен Q.AI экожүйелерімен байланыс орнатуға бағытталған.
Өтінім қабылдау мерзімі: 24 қыркүйек 2026 жылға дейін.
Қатысуға өтінім беру: https://astanahub.com/account/service/mentorship01/request/679/create/
