Қазақстандағы кадр даярлау жүйесін цифрландыру және жасанды интеллектінің дамуын ескере отырып қайта құру жоспарланып отыр. Премьер-министр Олжас Бектенов жұмысшы мамандардың жаңа технологиялармен жұмыс істеу дағдыларын күшейтуді тапсырды, деп хабарлайды Tech-news.
Үкімет отырысында жұмысшы кәсіптеріне мамандар даярлаудың жаңа тәсілдері талқыланды. Бектеновтің айтуынша, технологиялық жаңғыру еңбек нарығына қойылатын талаптарды өзгертіп жатыр, сондықтан білім беру жүйесі де осы өзгерістерге тез бейімделуі қажет.
Қазір Қазақстанда 763 колледж жұмыс істейді. Онда 556 мың студент білім алуда. Ал 552 колледжде 11,6 мыңнан астам кәсіпорынның қатысуымен 138 мың адам дуальды оқытуға тартылған. 2026 жылы 160 мамандық бойынша 3 мыңнан астам білім беру бағдарламасы жаңартылды.
Еңбек және халықты әлеуметтік қорғау министрлігінің болжамына сәйкес, 2035 жылға дейін ел экономикасына 2,9 млн қызметкер қажет болады. Оның 1,8 миллионы жұмысшы мамандар болуы тиіс.
Кадрларға сұраныс әсіресе өнеркәсіп, құрылыс, ауыл шаруашылығы, көлік және логистика, энергетика, сауда мен қызмет көрсету салаларында жоғары болады деп күтіледі.
Премьер-министрдің пікірінше, болашақ маман тек кәсіби міндеттерін орындап қана қоймай, өндірістегі цифрлық құралдарды да меңгеруі керек. Атап айтқанда, мамандар цифрлық басқару жүйелерімен жұмыс істеп, нақты өндірістік мәселелерді шешуде жасанды интеллект құралдарын қолдана алуы қажет.
Осыған байланысты Үкімет қолданыстағы кадр даярлау моделін еңбек нарығының жаңа талаптарына бейімдеуді көздеп отыр. Негізгі мақсат — технологиялық өзгерістерге дайын жаңа буын мамандарын қалыптастыру.
