Қазақстан халықаралық есеп айырысуларды жеделдету үшін цифрлық қаржы құралдарын пайдалануды жоспарлап отыр. Үкімет Ұлттық банкке осындай тетіктерді зерттеп, қазақстандық бизнеске беретін мүмкіндіктерін бағалауды тапсырды, деп хабарлайды Tech-news.
Бұл туралы Премьер-министр Олжас Бектенов Үкімет отырысында мәлімдеді.
Цифрлық қаржы құралдарын дамыту трансшекаралық төлемдерді жетілдіруге жол ашуы мүмкін. Мұндай шешімдер халықаралық есеп айырысуларды жылдамдатып, бизнес үшін қаржы операцияларын жүргізуді жеңілдетуге бағытталған.
Олжас Бектенов Қазақстан жаңа технологиялардың әлеуетін дер кезінде бағалап, осы бағытта өз құзыреттерін қалыптастыруы қажет екенін айтты.
«Цифрлық қаржы құралдарын дамыту халықаралық есеп айырысу жүйесін жетілдіру бағытында жаңа мүмкіндіктер ашады. Қазақстан үшін мұндай шешімдердің әлеуетін дер кезінде бағалап, осы бағытта өз құзыреттерін қалыптастыру маңызды», — деді Премьер-министр.
Үкімет басшысы Ұлттық банкке мүдделі тараптармен бірлесіп, цифрлық қаржы құралдарын халықаралық есеп айырысуларда қолдану мүмкіндігін қарастыруды тапсырды.
Жұмыс барысында төлемдердің жылдамдығын арттырып, қазақстандық компаниялардың халықаралық нарықтағы мүмкіндіктерін кеңейтетін шешімдер айқындалуы тиіс.
Қазіргі уақытта нақты қандай цифрлық құралдар қолданылатыны, жоба қашан іске қосылатыны және оның техникалық тетіктері жарияланған жоқ.
Бастама Қазақстанның цифрлық қаржы инфрақұрылымын дамытуға және халықаралық есеп айырысулардағы жаңа технологиялардың әлеуетін пайдалануға бағытталған.
