Астанада өтіп жатқан AI Month аясындағы HackAlem AI хакатоны 2 415 қатысушыны жинап, Guinness World Records әлемдік рекордын жаңартты. Қазақстандағы хакатон бұған дейінгі 2 089 қатысушыдан тұратын рекордты 326 адамға басып озды, деп хабарлайды Tech-news.
Алдыңғы рекорд 2025 жылғы 21 желтоқсанда Үндістанның Хайдарабад қаласында өткен хакатонда тіркелген. Оны Google for Developers және Google Developer Groups Hyderabad ұйымдастырған болатын.
Жаңа рекордты Guinness World Records ресми төрешісі Гленн Поллард растады. Оның айтуынша, қорытынды есепке тек тіркеуден және сәйкестендіруден өткен, хакатон талаптарын орындаған әрі белгіленген уақыт аралығында алаңда болған қатысушылар енгізілген.
Қатысушылардың кіріп-шығуы жеке бейдждерді сканерлеу арқылы бақыланды. Ал әр секторда стюардтар ережелердің сақталуын қадағалады. Жобалармен тікелей жұмыс істеген қатысушылар ғана рекордтық көрсеткішке есептелді.
HackAlem AI жасанды интеллект, цифрлық технологиялар, киберқауіпсіздік және технологиялық дағдыларға арналған AI Month бағдарламасын бастады. Хакатон барысында әзірлеушілер, студенттер мен жас мамандар нақты міндеттерге арналған AI шешімдерін жасауға қатысты.
«GUINNESS WORLD RECORDS әлемдік рекордын орнату — Қазақстанның технологиялық қоғамдастығының ортақ жетістігі және еліміздің жоғары әлеуетінің дәлелі. HackAlem AI озық технологияларды қолдана отырып, экономиканың нақты міндеттерімен жұмыс істеген мыңдаған дарынды әзірлеушіні, студентті және жас маманды біріктірді. Біз үшін мұнда жасалған жобалардың идея мен прототиптен бастап пилоттық жобаға және нақты енгізуге дейінгі жолын жалғастыруы маңызды. Бұл нәтиже Қазақстанның жаһандық технологиялық күн тәртібіне қатысып қана қоймай, оны қалыптастыруға да қабілетті екенін көрсетеді. HackAlem AI Мемлекет басшысы жариялаған Цифрландыру және жасанды интеллект жылына орай өтіп жатқан AI Month аясында ұйымдастырылды», — деді Қазақстан Республикасы Премьер-Министрінің орынбасары — Жасанды интеллект және цифрлық даму министрі Жаслан Мәдиев.
HackAlem AI Astana Hub қолдауымен, AI & Digital Bridge 2026 қарсаңында және Қазақстандағы Цифрландыру және жасанды интеллект жылы аясында ұйымдастырылды.
Іс-шараға Қазақстанның Жасанды интеллект және цифрлық даму министрлігі, Ғылым және жоғары білім министрлігі, Астана әкімдігі, Astana Hub, Silkroad Innovation Hub, BAITC, AI & Digital Bridge және халықаралық технологиялық ұйымдар мен компаниялар серіктес болды.
