Нью-Йоркте автоматты түрде ұзартылатын жазылымдарға қатысты жаңа Click-to-Cancel ережелері күшіне енді. Енді компаниялар клиентке жазылымды қалай рәсімдесе, одан дәл сондай оңай жолмен бас тартуға мүмкіндік беруі керек, деп хабарлайды Tech-news.
Жаңа талап автоматты түрде жаңартылатын жазылымдар мен тұрақты төлем қарастырылған қызметтердің барлығына қатысты.
Компаниялар пайдаланушыға қызметтің құнын, төлемнің қаншалықты жиі алынатынын, жазылымның ұзарту шарттарын және одан бас тарту мерзімін алдын ала әрі түсінікті тілмен көрсетуге міндетті. Бас тарту кезінде қосымша кедергілер жасауға да тыйым салынады.
Мысалы, қызметке жазылу бір батырманы басу арқылы жүзеге асса, оны тоқтату үшін бірнеше беттен өтіп, операторға хабарласу немесе қосымша өтініш толтыру талап етілмеуі тиіс.
Талаптарды бұзған компанияларға кезең-кезеңімен өсетін айыппұл қарастырылған. Бірінші бұзушылық үшін — $525, екінші жағдайда — $1050, ал кейінгі әрбір бұзушылық үшін $3500 айыппұл салынады.
Сонымен қатар сот компанияны клиенттерге ақшасын қайтаруға міндеттей алады.
Нью-Йорк билігінің бағалауынша, жаңа талап тұрғындарға жыл сайын $22 млн-нан $163 млн-ға дейін қаражат үнемдеуге мүмкіндік беруі мүмкін.
Нью-Йорк мэрі Зохран Мамдани ереженің негізгі қағидасын қарапайым түрде түсіндірді: қызметке бір рет басу арқылы жазылуға болатын болса, одан бас тарту да бір рет басумен орындалуы керек.
Автоматты жазылымдардан оңай бас тарту талабын АҚШ-тың Федералдық сауда комиссиясы да бүкіл ел аумағында енгізуге тырысқан. Алайда 2025 жылы сот бұл ережені рәсімдік талаптардың бұзылғаны себепті күшін жойды.
Осылайша, Нью-Йорктің жаңа Click-to-Cancel ережесі әзірге штат деңгейінде тұтынушылардың жазылымдарды басқаруын жеңілдетуге бағытталған талап ретінде қолданыла бастады.
