Қазақстанда 1 қыркүйектен бастап бейнебақылау жүйелеріне арналған жаңа ұлттық стандарт қолданысқа енгізілді. Ол камералардың кескін сапасына, бейнежазбаларды сақтау мерзіміне және жабдықтың жұмысына қойылатын талаптарды белгілейді. Жаңа стандарт бойынша бейнебақылау камераларының негізгі бейнеағынының ажыратымдылығы кемінде 1920 × 1080 пиксель, ал жиілігі секундына кемінде 25 кадр болуы керек.
Жүйе бейнені үздіксіз жазып, жазбаларды кемінде 30 тәулік сақтауы тиіс. Сонымен қатар деректерді қорғау, жабдықтардың өзара үйлесімділігі және резервтік электрмен жабдықтау талаптары қарастырылған.
Камералар атқаратын қызметіне қарай бірнеше түрге бөлінеді. Бірі аумақтар мен ғимараттарды жалпы бақылауға арналса, басқалары адамдарды анықтау және сәйкестендіру, автокөлік нөмірлерін тану үшін қолданылады. Басқарылатын камераларға да жеке талаптар қарастырылған.
Стандарт бейнеаналитиканы пайдалануға мүмкіндік береді. Оның көмегімен архивтен қажетті оқиғаларды іздеуге немесе белгілі бір оқиғаларды автоматты түрде тіркеуге болады.
Камералар қайда орнатылады?
Стандарт нысандарды жобалау, салу және реконструкциялау кезінде қарастырылатын бейнебақылау жүйелеріне қатысты.
Құжаттың қосымшасында көппәтерлі тұрғын үйлер, білім беру ұйымдары, жекелеген медициналық мекемелер, дүкендер, сауда және бизнес орталықтары, әкімшілік ғимараттар, көлік және спорт нысандары көрсетілген.
Алайда бұл аталған нысандардың барлық бөлмесіне камера орнату қажет дегенді білдірмейді.
Мысалы, тұрғын үйлерде бейнебақылау автотұрақтардың кіретін және шығатын жерлерінде, ғимараттың кіреберістері мен шығаберістерінде, фойеде, ортақ дәліздер мен лифт аймақтарында қарастырылған.
Мектептер мен басқа білім беру ұйымдарында камералар кіреберістерде, эвакуациялық шығу жолдарында, олардың алдындағы алаңдарда, сондай-ақ вестибюльдер мен фойелерде қарастырылады.
Сауда және интеграция министрлігінің түсіндіруінше, нысанның стандарт қосымшасында көрсетілуі оған міндетті түрде камера орнату немесе Ұлттық бейнемониторинг жүйесіне қосу қажет дегенді білдірмейді. Ол үшін нақты нысанға қатысты тиісті нормативтік негіз болуы керек.
Ескі камераларды ауыстыру қажет пе?
Қолданыстағы барлық камераны белгілі бір мерзімге дейін міндетті түрде ауыстыру талабы жоқ.
Жүйені жаңғырту қажеттілігі нақты жабдықтың техникалық сипаттамаларына және нысанға қойылатын талаптарға байланысты анықталады. Егер камераларды баптау немесе орналасуын өзгерту арқылы стандарт талаптарына сәйкестендіруге мүмкіндік болса, бүкіл жүйені ауыстыру қажет емес.
Ұлттық бейнемониторинг жүйесіне қосылуға тиіс нысандарға бөлек талаптар қойылады. Мұндай жағдайда жүйе қосылудың техникалық шарттарына сәйкес болуы керек.
Оны техникалық оператор тексереді. Жүйе талаптарға сай болса, Ұлттық бейнемониторинг жүйесіне қосылады. Сәйкессіздіктер анықталса, нысан иесіне оларды жою үшін мерзім беріледі.
Жаңа талап үшін айыппұл салына ма?
Ұлттық стандарттың өзінде айыппұл, тексерудің бірыңғай тәртібі немесе камераларды жаңғыртуды қаржыландыру ережелері белгіленбеген.
Министрліктің мәліметінше, жеке тұлғаны немесе ұйымды әкімшілік жауапкершілікке тарту үшін тек ұлттық стандартқа сілтеме жасау жеткіліксіз.
Сондай-ақ құжат камераларды ауыстыру немесе жаңарту шығынын кім және қандай қаражат есебінен өтеуі керектігін анықтамайды.
Жаңа талаптар бейнежазбалардың сапасын және олардың сақталуын жақсартуға бағытталған.
