Facebook қолданушылары енді лента мен Reels бөлімінде қандай контент көргісі келетінін алгоритмге өз сөздерімен түсіндіре алады. Your Algorithm деп аталатын жаңа функция қызығушылықтарды нақтылауға және қажетсіз тақырыптарды азайтуға мүмкіндік береді, деп хабарлайды Tech-news.
Бұған дейін платформа ұсыныстарды негізінен лүпіл, пікір және көру тарихына сүйеніп қалыптастырса, енді қолданушылардың тікелей нұсқауларын да ескереді. Мысалы, тарих пен география туралы видеоларды көбейтуді немесе шоу-бизнес жаңалықтарын сирек көрсетуді сұрауға болады.
Функцияға жарияланымның жанындағы үш нүктелі мәзір арқылы кіруге болады. Қолданушылар өзіне ұнаған немесе қызықсыз деп тапқан материалдарды белгілеп, көргісі келетін тақырыптардың тізімін жасай алады. Қажет болған жағдайда Facebook қосымша сұрақтар қойып, адамның қызығушылығын дәлірек анықтайды.
Your Algorithm-ның басты ерекшелігі — алгоритмге күнделікті тілде нұсқау беру мүмкіндігі. Жүйе қолданушының өтініштерін ескеріп, ұсыныстарды іс жүзінде нақты уақытқа жақын режимде жаңарта бастайды.
Дегенмен Facebook ұсыныстар алгоритмінен толық бас тартуға мүмкіндік бермейді. Платформа жарияланымдарды бұрынғыдай өзі сұрыптайды, ал жаңа функция қолданушыға осы үдеріске көбірек ықпал етуге жол ашады.
Meta компаниясы осындай тәсілдерді Instagram мен Threads платформаларында да енгізген. Facebook-та Your Algorithm функциясын тарату кезең-кезеңімен жүзеге асады, сондықтан ол барлық қолданушыға бір уақытта қолжетімді болмауы мүмкін.
