Қазақстандықтар енді Kaspi.kz қосымшасы арқылы өздері қалаған медициналық ұйымға онлайн тіркеле алады. Жаңа сервис азаматтарға емхананы қашықтан таңдауға, сондай-ақ қай медициналық ұйымға тіркелгенін және МӘМС жүйесіндегі мәртебесін тексеруге мүмкіндік береді, деп хабарлайды Tech-news.
Қызмет қосымшаның «Мемлекеттік қызметтер» бөлімінде қолжетімді. Пайдаланушылар осы жерден жаңа емхананы таңдап, өздеріне қызмет көрсететін дәрігер туралы ақпаратты да қарай алады.
Kaspi.kz басшысы әрі негізін қалаушы Михаил Ломтадзенің айтуынша, жаңа мүмкіндік мемлекеттік қызметтерді күнделікті өмірде қолдануды жеңілдетуге бағытталған. Бұған дейін қосымша арқылы тұрғылықты жер бойынша тіркелуге, мемлекеттік жәрдемақылар мен зейнетақыларға қатысты қызметтерді пайдалануға, баланың тууын тіркеуге, автокөлікті қайта рәсімдеуге және анықтамалар алуға болатын.
ҚР Денсаулық сақтау вице-министрі Ербол Оспанов жаңа сервисті цифрлық денсаулық сақтауды дамыту және медициналық қызметтердің қолжетімділігін арттыру бағытындағы кезекті қадам деп атады. Оның мәліметінше, жоба Денсаулық сақтау министрлігі, Республикалық электрондық денсаулық сақтау орталығы, Жасанды интеллект және цифрлық даму министрлігі, «Ұлттық ақпараттық технологиялар» АҚ және Kaspi.kz бірлесіп жүзеге асырған.
Қызмет туралы нені білу керек?
Азамат бір уақытта тек бір медициналық ұйымға тіркеле алады.
Таңдауға болатын емханалардың тізімін мемлекеттік органдар белгілейді.
Тегін медициналық көмекке кепілдік берілген тегін медициналық көмек көлемі (ТМККК) және міндетті әлеуметтік медициналық сақтандыру (МӘМС) жүйелері аясында қол жеткізуге болады.
Емханаға тіркелу, тіркелген ұйым туралы ақпаратты қарау және МӘМС мәртебесін тексеру Kaspi.kz қосымшасында қолжетімді.
Жаңа сервис емханаға тіркелу үшін медициналық ұйымға жеке бармай-ақ, мемлекеттік қызметті смартфон арқылы рәсімдеуге жол ашады.
