Қазақстанда мектепке дейінгі мекемелер қызметінің бағасы өсіп жатыр. Ranking.kz сарапшыларының мәліметінше, 2026 жылдың ақпан айының қорытындысы бойынша елімізде балабақшалар мен үйірмелердің орташа айлық бағасы 30 мың теңгені құрады, деп хабарлайды Tech-news.
Айта кетерлігі, бұл көрсеткіш тек балабақшаларды ғана емес, яслилерді, түзету орталықтары мен түрлі секцияларды да қамтиды.
Бағасы ең жоғары қалалар
Еліміздің 20 ірі қаласының тең жартысында баға республикалық орташа деңгейден жоғары болып шықты. Ең қымбат қызметтер келесі қалаларда тіркелген:
1. Алматы: 38,2 мың теңге (орташа деңгейден 27% жоғары);
2. Астана: 36 мың теңге;
3. Қостанай: 36 мың теңге;
4. Өскемен: 35,7 мың теңге;
5. Павлодар: 33,1 мың теңге.
Ең төменгі тарифтер Түркістанда байқалады – айына небәрі 12,7 мың теңге, бұл Алматымен салыстырғанда 3 есеге жуық арзан. Сондай-ақ қолжетімді бағалар Тараз (19,3 мың тг) және Қызылорда (19,4 мың тг) қалаларында сақталған.
Қымбаттау қарқыны: Өскемен көш бастап тұр
Бір жыл ішінде Қазақстан бойынша мектепке дейінгі білім беру қызметтері орта есеппен 10% қымбаттады. Алайда кей өңірлердегі өсім инфляция деңгейінен әлдеқайда жоғары:
• Өскемен: +40%;
• Семей: +33,2%;
• Қонаев: +24,1%;
• Петропавл: +19,1%.
Керісінше, Қарағандыда бағаның 0,5% төмендеуі байқалған.
