Қазақстанда жұмыссыз азаматтарды жаңа мамандыққа бейімдеуге арналған қысқа мерзімді кәсіптік оқыту бағдарламасы жалғасып жатыр. Оқу барысында қатысушыларға шәкіртақы төленіп, жол жүру, тұрғын үй жалдау және медициналық тексеру шығындарының бір бөлігі мемлекет есебінен өтеледі, деп хабарлайды Tech-news.
Еңбек және халықты әлеуметтік қорғау министрлігінің мәліметінше, оқу бағдарламасының ұзақтығы алты айға дейін созылады.
Бағдарламаға қатысушылар ай сайын 43 574 теңге көлемінде шәкіртақы алады. Сонымен қатар 17 300 теңге мөлшерінде жол жүру шығыны өтеледі. Егер басқа өңірде оқуға немесе тәжірибеден өтуге қажеттілік туындаса, тұрғын үйді жалдау шығындарына 64 875 теңгеге дейін өтемақы қарастырылған.
Бұдан бөлек, міндетті медициналық тексеруден өтуге кететін шығындарды да мемлекет өз мойнына алады.
Кәсіптік даярлықты жұмыс берушінің өндірістік алаңында өтуге де мүмкіндік бар. Мұндай форматта тәжірибеден өтетін азаматтарға 86 500 теңге көлемінде жалақы төленеді.
Жаңа дағдыларды қашықтан меңгергісі келетіндер үшін Skills.enbek.kz платформасында онлайн курстар қолжетімді. Бұл сервис арқылы азаматтар біліктілігін арттырып немесе еңбек нарығында сұранысқа ие жаңа мамандықтарды игере алады.
Министрлік дерегіне сәйкес, жыл басынан бері бұл мүмкіндікпен 37 мыңнан астам жұмыссыз қазақстандық пайдаланған.
