Қазақстан мен Әзербайжанды жалғайтын Транскаспий талшықты-оптикалық байланыс желісінің құрылысы белсенді кезеңге өтті. Баку–Ақтау бағыты бойынша суасты кабелін төсеу жұмыстары арнайы кеменің қатысуымен басталды, деп хабарлайды Tech-news.
Бұл жоба Еуропа мен Азия арасындағы деректер алмасу жылдамдығын арттыруға арналған жаңа цифрлық дәліз қалыптастырады. Магистраль халықаралық байланыс арналарының тұрақтылығын күшейтіп, өңірдегі интернет инфрақұрылымының сенімділігін арттыруы тиіс.
Қазір негізгі құрылыс кезеңі басталды. Мамандандырылған кеме Каспий теңізінің түбімен талшықты-оптикалық кабель төсеуге кірісті. Дәл осы кабель Қазақстан мен Әзербайжан арасындағы жоғары жылдамдықты деректер тасымалын қамтамасыз етеді.
Жоба Қазақстан үшін стратегиялық маңызға ие. Ол елдің халықаралық цифрлық инфрақұрылымдағы рөлін күшейтіп, Қазақстанды Еуропа мен Азия арасындағы негізгі деректер транзиті бағыттарының біріне айналдыруға мүмкіндік береді.
Сарапшылардың пікірінше, мұндай цифрлық магистральдар халықаралық интернет арналарының өткізу қабілетін кеңейтіп қана қоймай, байланыс тұрақтылығын арттыруға және жаңа цифрлық сервистердің дамуына негіз қалайды.
