«Әуежай – Астана» кеден бекетінің қызметкерлері жолаушылардың Қазақстанға ірі көлемде мобильді құрылғыларды декларациясыз алып кірмек болғанын анықтады. Бұл туралы Қаржы министрлігінің Мемлекеттік кірістер комитеті хабарлады.
Кедендік бақылау кезінде жолаушылардың «жасыл дәліз» арқылы өтіп, багажындағы мобильді құрылғыларды декларацияламағаны белгілі болды.
Осындай жағдайлардың бірінде жолаушы бірден 50 смартфон алып өтпек болған. Бұл жеке тұлғаның кедендік төлемдер мен декларациясыз жеке пайдалануға арналған тауар ретінде алып өтуіне рұқсат етілген мөлшерден едәуір көп.
Жалпы кеден қызметкерлері 223 iPhone 18 смартфоны мен 10 жұп AirPods анықтады.
Тексеру барысында төрт адамның жеке кәсіпкер ретінде тіркелгені белгілі болды. Тағы төрт адам тауарларды жеке кәсіпкер ретінде тіркелмей әкелген.
Мемлекеттік кірістер комитетінің мәліметінше, жеке тұлға кеден шекарасы арқылы бір адамға екі смартфоннан артық алып өте алмайды.
Егер әкелінетін тауарлардың саны немесе сипаты жеке пайдалануға арналған тауарларға қойылатын талаптарға сәйкес келмесе, олар кедендік декларациялауға және тиісті рәсімдеуге жатады.
Тәркіленген мобильді құрылғылар уақытша сақтау қоймасына орналастырылды. Анықталған фактілер бойынша заңнамада көзделген әкімшілік жауапкершілік шаралары қабылданып жатыр.
Бұл талаптар Қазақстан Республикасы Қаржы министрінің 2015 жылғы 31 наурыздағы №250 бұйрығымен бекітілген.
