Google компаниясының Android Earthquake Alerts System жүйесі енді әлемнің 200 елінде жұмыс істейді. Бұған дейін жер сілкінісі туралы ескерту қызметі 98 елді қамтыған. Жүйе Android смартфондарының қозғалыс датчиктерін пайдаланып, жер асты дүмпулерін анықтауға және тұрғындарға қауіп туралы хабарлауға көмектеседі, деп хабарлайды Tech-news.
Google бұл технологияны алғаш рет 2020 жылдың тамызында таныстырды. Жүйе бастапқыда АҚШ-тың Калифорния штатында іске қосылып, онда Геологиялық қызметтің ShakeAlert желісі пайдаланылды. 2021 жылы технология Қазақстан, Грекия, Жаңа Зеландия, Түркия және Филиппин сияқты елдерге таралды. 2023 жылы Үндістан да жүйеге қосылды. Енді қызметтің географиялық қамту аясы 200 елге жетті.
Android Earthquake Alerts System смартфондарға орнатылған акселерометрлерді пайдаланады. Бұл датчиктер құрылғының қозғалысы мен үдеуін өлшейді. Бір аумақтағы бірнеше смартфон жер сілкінісіне тән тербелістерді тіркесе, деректер Google серверлеріне жіберіледі. Жүйе сол ақпарат арқылы дүмпудің ықтимал орнын және күшін бағалайды.
Дегенмен технология барлық жер сілкінісін анықтауға кепілдік бермейді. Кей жағдайда ескерту жер асты дүмпулері басталғаннан кейін келуі мүмкін.
Google жүйесі болжанған дүмпу қарқынына қарай үш түрлі хабарлама ұсынады:
- Be Aware — әлсіз тербелістер туралы ақпарат береді.
- Be Ready — сезілуі мүмкін, бірақ әдетте қауіп деңгейі төмен дүмпулер туралы ескертеді.
- Take Action — орташа немесе күшті жер сілкінісі кезінде экранды толық қамтитын шұғыл хабарлама көрсетеді.
Алдағы айларда Google Be Ready ескертуінің мүмкіндіктерін кеңейтуді жоспарлап отыр. Пайдаланушылар дүмпу тіркелген аумақтың картасын, жер сілкінісінің болжамды магнитудасын және қауіпсіздік жөніндегі ұсыныстарды көре алады.
Қолдау көрсетілетін Android смартфондарында жер сілкінісі туралы хабарламалар әдетте әдепкі бойынша қосулы тұрады. Қажет болған жағдайда оларды телефонның қауіпсіздік және төтенше жағдайлар параметрлерінен өшіруге болады.
Google жүйенің мүмкіндіктері шектеулі екенін де ескертеді: ол әрбір жер сілкінісін анықтай алмайды және хабарламаның дүмпуге дейін келетініне кепілдік бермейді. Сондықтан бұл қызмет қауіп туралы ертерек білуге көмектескенімен, ресми ескертулер мен қауіпсіздік нұсқауларын алмастырмайды.
