Президент Қасым-Жомарт Тоқаев жасанды интеллект шығармашылық саласында жастардың өз идеясын жүзеге асыруына жаңа мүмкіндіктер ашып жатқанын айтты. Оның пікірінше, технология шағын шығармашылық топтардың ірі студиялармен бәсекеге түсуіне жағдай жасап отыр, деп хабарлайды Tech-news.
Мемлекет басшысы Astana AI Film Festival халықаралық байқауының ашылуында жасанды интеллектінің кино өндірісіне ықпалын атап өтті.
Тоқаевтың айтуынша, бүгінде фильм түсіру үшін үлкен студияға немесе продюсерлік компанияға жүгініп, демеуші іздеудің қажеті азайды. Технология шығармашылық топтардың нарыққа шығуын жеңілдетіп, бәсекелестікті күшейтеді.
Бұл жағдай талантты авторларға өз жобаларын көрсетуге мүмкіндік береді. Президенттің пікірінше, аталған мүмкіндікті шығармашылық қауымдастықты дамытуға тиімді пайдалану қажет.
Сонымен қатар Тоқаев жасанды интеллектіні шығармашылық адамның орнын басатын құрал ретінде емес, оның жұмысын жеңілдететін көмекші ретінде қарастыру керектігін айтты.
Президент Astana AI Film Festival талантты әрі мақсатшыл авторларға жаңа мүмкіндік беріп, әлемдік креативті индустрияның дамуына ықпал етеді деп санайды.
Фестивальге әлемнің 125 елінен 8 мыңнан астам өтінім түскен. Байқауға АҚШ, Үндістан, Қытай, Оңтүстік Корея, Ұлыбритания, Индонезия, Жапония, Бразилия, Франция және басқа елдердің авторлары қатысып отыр.
Қазылар алқасының құрамына өнер және технология саласында халықаралық деңгейде танылған мамандар енген.
Тоқаев фестиваль қатысушыларының тәжірибе алмасып, болашақта бірлескен жобалар жасауына мүмкіндік туатынына сенім білдірді.
