Қазақстан экономикасына 2035 жылға дейін 2,9 млн маман қажет болады. Оның 1,8 миллионы жұмысшы кәсіптерге тиесілі. Ең жоғары сұраныс өнеркәсіп, құрылыс, ауыл шаруашылығы және IT салаларында қалыптасады, деп хабарлайды Tech-news.
Еңбек және халықты әлеуметтік қорғау министрі Асқарбек Ертаевтың айтуынша, елдегі жұмыс күші қазір 9,8 млн адамды құрайды. Оның 9,4 миллионы жұмыспен қамтылған, яғни жұмыспен қамту деңгейі 96%-ға жетіп отыр.
Сонымен бірге еңбек нарығында жұмысшы мамандарға сұраныс жоғары. Электрондық еңбек биржасындағы бос жұмыс орындарының жартысынан астамы осы санаттағы кәсіптерге тиесілі.
Алдағы жылдары кадр тапшылығы болуы мүмкін негізгі бағыттардың қатарына инженерия, құрылыс, өңдеуші өнеркәсіп, биотехнология, жасыл және ядролық энергетика кіреді. Осы салалардағы сұранысқа ие кәсіптердің тізімі 51-ден 174-ке дейін кеңейтілген.
Еңбек нарығына технологиялар мен жасанды интеллекттің әсері де күшейіп келеді. Кейбір кәсіптер біртіндеп жоғалса, көпшілігі жаңа технологияларға бейімделіп өзгереді. Сонымен қатар бұрын болмаған жаңа мамандықтар пайда болады.
Сондықтан мамандарды даярлау жүйесі еңбек нарығындағы өзгерістерді алдын ала ескеріп, білім беру бағдарламалары мен біліктілік талаптарын тұрақты жаңартып отыруы керек.
