Қазақстанда қаржы секторын одан әрі цифрландыру және жасанды интеллектіні енгізу бойынша 1200 нақты шара белгіленді. Нарықтағы 94 қаржы ұйымының әрқайсысына жеке даму жоспары жасалған. Қаржы нарығын реттеу және дамыту агенттігі қаржы секторын ауқымды цифрландыру және жасанды интеллектіні одан әрі енгізу стратегиясын әзірлеп жатыр. Бұл туралы агенттік төрағасы Мәдина Әбілқасымова Central Asia FinTech Summit барысында мәлімдеді, деп хабарлайды Tech-news.
Оның айтуынша, цифрлық трансформация аясында 1200 нақты шара белгіленіп, 94 қаржы ұйымының әрқайсысына жеке даму жоспары дайындалған.
«Біз 1200 нақты шараны белгіледік. 94 ұйымның әрқайсысы бойынша жеке даму жоспары әзірленді. Енді осы жоспарлар бойынша жұмыс істейміз», – деді Мәдина Әбілқасымова.
Жоспар 23 банкті, 25 сақтандыру ұйымын, бағалы қағаздар нарығының 31 қатысушысын және 15 микроқаржы ұйымын қамтиды.
Негізгі бағыттардың қатарында ішкі процестерді цифрландыру, IT-инфрақұрылымды дамыту, деректер сапасын арттыру, киберқауіпсіздікті күшейту, жасанды интеллектіні енгізу және қызметкерлердің цифрлық құзыреттерін дамыту бар.
Белгіленген шаралардың орындалуын бақылау үшін Қаржы нарығын реттеу және дамыту агенттігінің жанынан цифрлық трансформация кеңсесін құру жоспарланып отыр.
Мәдина Әбілқасымованың айтуынша, әр ұйымға жеке жоспар әзірлеу қажеттілігі қаржы нарығына қатысушылардың цифрлық даму деңгейінің әркелкі болуына байланысты.
