Қазақстан Қытаймен бірге көлік-логистика инфрақұрылымын жаңғыртып, цифрлық технологиялар мен жүргізушісіз көлік шешімдерін енгізуге кірісті. 2029 жылға қарай Қытайдан Еуропаға қатынайтын контейнерлі пойыздар саны 3 мыңға дейін жетуі мүмкін, деп хабарлайды Tech-news.
Мемлекет басшысы Қасым-Жомарт Тоқаев «Қазақстан–Қытай» инвестициялық форумында екі ел арасындағы серіктестіктің негізгі бағыттарын атады. Оның ішінде көлік-логистика мен цифрлық инфрақұрылымға ерекше мән берілді.
Қазақстан теміржолдардың өткізу қабілетін арттырып, автомобиль жолдары мен теңіз порттарын кеңейту жұмыстарын жүргізіп жатыр. Сонымен қатар жүк авиациясы мен шекара маңы инфрақұрылымын дамыту жоспарланған.
Қазірдің өзінде Қытайдың Ляньюньган қаласынан Қазақстанның Ақтау портына дейінгі логистикалық байланыс қалыптасқан. Ал Ченду қаласындағы қазақ-қытай терминалы осы тізбектің жаңа буынына айналмақ.
Президенттің айтуынша, Қазақстан үшін Орта дәлізді дамыту стратегиялық бағыттардың бірі болып отыр. Бұл бағыт Азия мен Еуропа арасындағы жүк тасымалын Қазақстан аумағы арқылы байланыстырады.
Болжам бойынша, 2029 жылға қарай Қытайдан Еуропаға қатынайтын контейнерлі пойыздар саны 3 мыңға дейін көбейеді. Бұл Қазақстанның халықаралық транзиттік хаб ретіндегі рөлін күшейтуі мүмкін.
Логистика саласында цифрлық шешімдер де енгізіліп жатыр. «Ақылды шекара» пилоттық жобасы жүк тасымалы туралы ақпараттың ашықтығын арттыруға бағытталған.
Ал Қытайдың Minmetals Logistics компаниясымен бірлескен жоба аясында жүргізушісіз көлік технологиялары мен цифрлық шешімдер қолданылатын логистикалық дәліз құру жоспарланып отыр.
Қазақстан мультимодальді тасымалды да кеңейтуде. Биыл Alatau Air Cargo ұлттық жүк әуе компаниясы жұмысын бастады. Сонымен қатар ел нарығына Cathay Pacific Cargo сияқты халықаралық жүк тасымалдаушылар шықты.
Қазақстан мен Қытай арасындағы әуе қатынасы да кеңейіп келеді. Биыл Алматы–Сиань, Алматы–Шанхай, Астана–Гуанчжоу және Ақтау–Үрімжі бағыттары ашылды. Осы аптада Алматы мен Чунцин арасында алғашқы тікелей жолаушылар рейсі орындалды.
Көлік инфрақұрылымындағы басқа жобалардың қатарында Арал–Каспий автомагистралі, Мойынты–Қызылжар және Бақты–Аягөз теміржол желілері бар. Президенттің айтуынша, жаңа бағыттар Шығыс–Батыс көлік дәлізінің өткізу мүмкіндігін арттыруға мүмкіндік береді.
