Қазақстанда кәсіпкерлер лицензиялар мен рұқсаттардың бір бөлігін бірнеше апта күтпей-ақ ала алады. eLicense.kz порталы арқылы 2024 жылдан бері өтініштерді мамандардың қолмен қарауынсыз, автоматты түрде өңдеу арқылы 87 мыңнан астам мемлекеттік қызмет көрсетілген, деп хабарлайды Tech-news.
Бұған дейін жекелеген лицензиялар мен рұқсаттарды рәсімдеу үшін 15–30 күнтізбелік күн қажет болатын. Кәсіпкерлер құжаттарды жинап, мемлекеттік органға тапсырып, олардың тексерілуін және өтініш бойынша шешім шығуын күтуге мәжбүр еді.
Қазір бұл процестің бірқатар кезеңі автоматтандырылған. Кәсіпкер электрондық өтініш жібергеннен кейін жүйе қажетті ақпаратты мемлекеттік деректер базаларынан өзі алады. Одан соң мәліметтердің белгіленген талаптарға сәйкестігін тексереді. Барлық шарт орындалса, рұқсат беру туралы шешім автоматты түрде қалыптастырылады.
Яғни бұрын бірнеше аптаға созылған рәсім енді бірнеше сәтте аяқталады. Бұл ретте шешім мемлекеттік орган қызметкерінің тікелей қатысуынсыз, алдын ала бекітілген талаптар негізінде қабылданады.
Мұндай жүйені енгізу үшін мемлекеттік органдар әкімшілік рәсімдерді қайта қарап, артық талаптар мен кезеңдерді қысқартқан. Сонымен қатар мемлекеттік ақпараттық жүйелер өзара интеграцияланып, шешім қабылдау тәртібі цифрлық форматқа көшірілген.
Негізгі өзгеріс – қағаз құжаттарды электрондық нұсқаға ауыстырумен шектелмейді. Алдымен бюрократиялық процестер жеңілдетіліп, содан кейін автоматтандыру енгізілген. Соның арқасында кәсіпкерлер мемлекеттік қызметтерді алу кезінде уақытын үнемдеп, әкімшілік кедергілерді азайта алады.
Қазақстан Республикасы Жасанды интеллект және цифрлық даму министрлігі Мемлекеттік қызметтер комитетінің төрайымы Айнұр Юсупованың айтуынша, цифрландырудың тиімділігі енгізілген жүйелердің санымен емес, азаматтар мен бизнеске әкелген нақты пайдасымен бағалануы керек.
Оның пікірінше, мемлекетте бұрыннан бар ақпаратты кәсіпкерлерден қайта сұратудың немесе оны қолмен тексерудің қажеті жоқ. Егер шешімді мемлекеттік деректер мен нақты талаптар негізінде қабылдауға мүмкіндік болса, бұл процесс автоматты түрде орындалуы тиіс.
Қазір мұндай тетік құрылыс, ауыл шаруашылығы, сыртқы сауда, өнеркәсіптік қауіпсіздік және қоршаған ортаны қорғау сияқты салаларда қолданылады. Жалпы, автоматты түрде көрсетілетін мемлекеттік қызметтер саны бүгінде 12-ге жеткен.
Алдағы уақытта бұл тәсілді басқа да мемлекеттік қызметтерге енгізу жоспарланып отыр. Негізгі мақсат – мемлекет пен бизнес арасындағы байланысты жеңілдетіп, рұқсат беру рәсімдерін барынша жылдам әрі ашық ету.
