Adobe компаниясы Adobe MAX 2026 конференциясында Creative Cloud экожүйесіне арналған ауқымды жаңартуларын таныстырды. Firefly платформасына жаңа AI-модельдер мен шығармашылық агент қосылса, Photoshop пен Premiere бағдарламаларында кескінді өңдеу, жарықты реттеу және видеомонтаж жасауға арналған құралдар пайда болады. Сонымен қатар компания Google сервистерімен интеграцияны кеңейтті, деп хабарлайды Tech-news.
Adobe Firefly енді тек компанияның жеке модельдерімен шектелмейді. Платформаға Google, OpenAI, ByteDance, Kling және ElevenLabs әзірлеген модельдер де қосылады. Осылайша, пайдаланушылар әр жобаға қажетті AI-модельді өздері таңдай алады. Ал Adobe Creative Agent мәтіндік нұсқаулар арқылы шығармашылық тапсырмаларды орындауға көмектеседі.
Firefly Video сервисінде видеороликті әзірлеудің бірнеше кезеңін бір жұмыс кеңістігінде орындауға мүмкіндік беретін құралдар пайда болады. Пайдаланушылар сценарий мен раскадровка дайындап, клиптерді уақыт шкаласына орналастыра алады. Сондай-ақ субтитр, ауысу эффектілері мен қосымша кадрлар қосуға болады.
Firefly Image бөліміне төрт жаңа функция енгізіледі:
- Edit Object – суреттегі жекелеген нысандарды өзгерту;
- Edit Text – кескін ішіндегі жазуларды өңдеу;
- Relight – жарықтың бағыты мен қарқындылығын реттеу;
- Retouch – суреттерді қосымша өңдеу және кемшіліктерін түзету.
Бұл құралдар кескіннің басқа бөліктеріне әсер етпей, тек таңдалған элементтерді өзгертуге мүмкіндік береді.
Firefly Design иллюстрация, кескін өңдеу, анимация, 3D және баспа материалдарын бір жұмыс кеңістігіне біріктіреді. Ал Firefly Graph әртүрлі AI-модельдер мен Adobe құралдарын байланыстырып, қайталанатын процестерді автоматтандыруға арналған. Екі өнім де әзірге бета-нұсқада ұсынылады.
Тағы бір жаңалық – Firefly Builder. Ол мәтіндік сипаттама негізінде сайттардың, мобильді қосымшалар мен презентациялардың прототиптерін жасауға көмектеседі. Қазір сервис жабық тестілеуден өтіп жатыр.
Сонымен қатар Adobe объектілерді өшіру, бейне мұқабаларын дайындау және жарнамалық макеттер жасау сияқты күнделікті жұмыстарды жеңілдететін Quick Actions құралдарын ұсынады.
Photoshop бағдарламасындағы басты жаңалықтардың бірі – Relight құралы. Оның көмегімен суретке виртуалды жарық көздерін қосып, олардың орналасуын, түсін және қарқындылығын өзгертуге болады.
Generative Restyle функциясы мәтіндік сұраныс арқылы суреттің көркемдік стилін жаңартады. Ал нәтижедегі өзгерістің деңгейін арнайы сырғытпа арқылы реттеуге мүмкіндік бар.
Quick Compare құралы бастапқы сурет пен өңделген нұсқаны салыстыруды жеңілдетеді. Жаңартылған Remove Tool қажетсіз нысандарды ғана емес, олардан қалған көлеңке мен шағылыс сияқты бөлшектерді де дәлірек жояды.
Adobe сонымен қатар мәтіндік командалар арқылы кескінді өңдеуге арналған AI Assisted Editor құралын таныстырды. Оның кейбір мүмкіндіктері Photoshop-тың бета-нұсқасында қолжетімді болады.
Adobe Premiere бағдарламасында Color Mode атты жеке түс түзету кеңістігі пайда болады. Ол кадрлардың түсін реттеп, енгізілген өзгерістерді бірден бірнеше клипке қолдануға мүмкіндік береді.
Generative Remove құралы видеодағы қажетсіз нысандарды өшіріп, олардың орнын фонға сәйкес толықтыра алады. Ал Generative Media Tool монтаж уақыт шкаласының өзінде видео, дыбыстық эффектілер, музыкалық сүйемелдеу және дыбыстық фон жасауға мүмкіндік береді.
Аудиомен жұмыс істеуге арналған үш жаңа құрал да ұсынылды:
- Enhance Audio – дыбыс сапасын жақсарту;
- Separate Crosstalk – бір-бірімен қабаттасқан дауыстарды ажырату;
- Separate Sound Source – аудиодағы жеке дыбыс көздерін бөлу.
Бұл функциялар видеоның дыбыстық бөлігін өңдеуге кететін уақытты қысқартуға бағытталған.
Lightroom бағдарламасында Glow құралы суретке жұмсақ жарық эффектісін қосады, ал Blemish Removal терідегі ұсақ кемшіліктерді түзетуге көмектеседі.
Бета-нұсқадағы Open Eyes функциясы фотода көзі жұмылып қалған адамның көзін басқа референс суретке сүйене отырып түзете алады. Сонымен қатар Adobe компьютерге қосылған камера арқылы түсіру мүмкіндігін Lightroom-ның десктоптық нұсқасы мен iPad-та жаңартады.
Illustrator бағдарламасында контент кітапханалары жетілдіріліп, объектілерді араластыру параметрлерін тікелей жұмыс кеңістігінде басқару мүмкіндігі қосылады.
InDesign нақты уақыт режимінде бірлесіп жұмыс істеуді қолдайды. Flex Layout макет өзгерген кезде мәтіндік блоктардың өлшемін автоматты түрде бейімдейді. Check Document пен Rewrite құралдары құжатты тексеріп, мәтінді редакциялауға көмектеседі.
Adobe Creative Agent мүмкіндіктерін Creative Cloud-тың компьютерге орнатылатын бағдарламаларына да енгізеді. Мысалы, Premiere ішінде агент бірнеше клипке бірдей эффект қолдана алады, кадрдағы нысандарды бақылайды немесе тұтас видео тізбегінің түсі мен экспозициясын өзгертеді.
Adobe сонымен қатар MCP технологиясы арқылы сыртқы AI-агенттерді өз бағдарламаларымен байланыстырудың алдын ала нұсқасын көрсетті. Бұл интеграция басқа компаниялардың AI-агенттеріне Photoshop, Illustrator, Premiere және After Effects бағдарламаларындағы жергілікті файлдармен жұмыс істеуге мүмкіндік береді. Бұл ретте жобалардың қабаттары мен басқа элементтері әрі қарай өңдеуге жарамды күйде сақталады. Жабық тестілеу 2027 жылдың басында басталмақ.
Google-мен серіктестік те кеңейеді. Adobe Acrobat құралдары Google Drive пен Gmail сервистеріне қосылады. Ал Adobe өнімдері Gemini, Gemini Enterprise және Google іздеу жүйесіндегі AI режимінде қолжетімді болады.
Бұған қоса, Google-дың кескін және видео генерациялауға арналған модельдері Firefly, Photoshop, Premiere және Adobe Express платформаларына енгізіледі. Екі компания Photoshop-тағы кескіндерді өңдеу мүмкіндіктерін одан әрі дамыту жолдарын да қарастырады.
Осы жаңартулар Adobe-ның шығармашылық бағдарламаларын біртұтас AI-экожүйесіне айналдыру бағытын көрсетеді. Енді пайдаланушылар бірнеше модель мен құралды бір ортада таңдап, мәтіндік командалар арқылы күрделі шығармашылық процестердің бір бөлігін автоматтандыра алады.
