Қазақстанның Ішкі істер министрлігі QR-кодтарды пайдаланып жасалатын алаяқтықтың жаңа тәсілі туралы ескерту жасады. Қаскөйлер жалған QR-кодтарды қоғамдық орындарға жапсырып, адамдарды фишингтік сайттарға бағыттап жатыр, деп хабарлайды Tech-news.
Министрліктің мәліметінше, мұндай QR-кодтар қоғамдық көлік аялдамаларында, тұрғын үйлердің кіреберістерінде, жарнамалық тақталарда және адам көп жиналатын басқа да орындарда пайда болуы мүмкін. Кодты сканерлеген қолданушы сырт көзге сенімді көрінетін, бірақ алаяқтар жасаған жалған сайтқа өтеді.
Мұндай ресурстарда пайдаланушылардан банк картасының деректері, SMS арқылы келетін растау кодтары немесе басқа да жеке мәліметтер сұралады. Осы ақпарат қолға түскеннен кейін қаскөйлер ақша ұрлауға немесе аккаунттарды заңсыз пайдалануға әрекет етеді.
Мамандар бірнеше белгіге назар аударуға кеңес береді. Егер QR-код бұрыннан тұрған кодтың үстіне жапсырылған болса, сапасыз басылып шықса немесе «Дереу сканерлеңіз!», «Сыйлық алыңыз!» сияқты назар аударатын жазулармен ұсынылса, оған сенбеген жөн. Сондай-ақ ұйымның атауы, байланыс деректері немесе ресми ақпараттың болмауы да күмән тудыратын фактор саналады.
ІІМ азаматтарға шығу тегі белгісіз QR-кодтарды сканерлемеуге және код ашқан сайттың интернет-мекенжайын міндетті түрде тексеруге кеңес береді. Күмәнді парақшаларда банк картасының мәліметтерін, құпиясөздерді немесе SMS-кодтарды енгізуге болмайды.
Егер жеке немесе қаржылық деректеріңіз бөгде адамдардың қолына түсті деген күдік болса, банк картасын бірден бұғаттап, қызмет көрсететін банкке дереу хабарласу қажет. Бұл ықтимал қаржылық шығынның алдын алуға көмектеседі.
