Қазақстан Республикасы ІІМ Ұлттық ұланы әскери қызметшілерді психологиялық бағалау үдерісін цифрландыруды бастады. Жаңа E-Nazar платформасы тест нәтижелерін өңдеу уақытын екі сағаттан небәрі 10–15 минутқа дейін қысқартып, мамандардың жұмысын едәуір жеңілдетеді, деп хабарлайды Tech-news.
Жүйе психологиялық тестілеуді өткізу, нәтижелерді автоматты түрде талдау және есептерді қалыптастыру сияқты процестерді бір платформада біріктіреді. Соның арқасында қағаз құжат айналымы 80 пайыз азайып, психологтардың шамамен 2000 сағат жұмыс уақыты үнемделген.
E-Nazar платформасы мерзімді әскери қызметшілерге, келісімшарт бойынша қызмет ететін әскери мамандарға және офицерлер құрамына арналған психологиялық тестілеуді қамтиды. Барлық нәтижелер цифрлық форматта өңделіп, талдамалық ақпарат автоматты түрде жасалады.
Жүйенің негізгі артықшылықтарының бірі — жеке деректердің қауіпсіз сақталуы. Сонымен қатар ақпаратты өңдеу жылдамдығы артып, қағазбастылық азаяды және психологиялық қызмет мамандарының әкімшілік жүктемесі төмендейді.
Жобаның тағы бір ерекшелігі — платформада қолданылатын электрондық психологиялық әдістемелерді әскери қызметшілердің өздері әзірлеген. Ефрейтор Ким Хён У мен қатардағы жауынгер Берікжан Бектұрсынов аға офицерлердің жетекшілігімен жасаған ақпараттық өнімге патент беріліп, оның жаңашылдығы ресми түрде расталған.
E-Nazar алғаш рет Астанадағы 5573 әскери бөлімінде сынақтан өтті. Пилоттық кезеңнің нәтижесі сәтті болғандықтан, енді жүйені Ұлттық ұланның барлық бөлімшелеріне кезең-кезеңімен енгізу жоспарланып отыр. Болашақта ол әскери бөлімдердегі психологиялық ахуалды бақылауға арналған бірыңғай цифрлық құрал ретінде қолданылмақ.
Бұл бастама Мемлекет басшысының мемлекеттік секторды цифрландыру жөніндегі тапсырмасы аясында жүзеге асырылып жатыр. Бұған дейін дәл осы әскери бөлімде жасанды интеллект технологияларына негізделген заманауи бейнебақылау жүйесі де сынақтан өткізіліп жатқаны хабарланған.
