Қазақстанда креативті индустрия мен технология саласындағы жобаларды дамытуға бағытталған Creative Shift акселерациялық бағдарламасы іске қосылды, деп хабарлайды Tech-news.
Бағдарлама кәсіпкерлерге, креаторларға және шығармашылық командаларға өз идеясын бизнеске айналдырып, жобасын келесі деңгейге шығаруға көмектеседі
Бағдарламаны Креативті индустрияларды дамыту қоры ұйымдастырып отыр.
Creative Shift екі кезеңнен тұрады. Алғашқы кезең өңірлік буткемптер форматында өтеді: 21 қыркүйекте Алматыда, 5 қазанда Шымкентте және 19 қазанда Астанада.
Іріктеуден өткен үздік қатысушылар бағдарламаның келесі кезеңіне өтеді. Олар Астанада ұйымдастырылатын жеті күндік офлайн менторлық сессияға қатысып, жобаларын тәжірибелі мамандармен бірге пысықтайды.
Акселератор төрт негізгі бағытты қамтиды: аудиовизуалдық контент, музыка және сахна өнері, визуалды және қолданбалы өнер, сондай-ақ әдебиет, медиа және жасанды интеллект.
Бағдарлама бастапқы идеядан өтіп, белгілі бір деңгейде қалыптасқан және әрі қарай өсуге әлеуеті бар жобаларға арналған. Қатысушылар бизнес-моделін жетілдіру, жобаны монетизациялау және нарыққа ілгерілету тәсілдерін үйренеді.
Бағдарлама барысында AI технологияларын практикалық қолдану, өнімді тарату арналары, инвестиция тарту және жобаны ауқымдау мәселелеріне де назар аударылады.
Яғни Creative Shift қатысушыларға тек шығармашылық идеяны дамытуға емес, оны тұрақты әрі табыс әкелетін жобаға айналдырудың нақты құралдарын ұсынуды көздейді.
Бағдарламаға қатысу талаптары мен өтінім беру тәртібі QazaqCreative платформасының «Қолдау шаралары» бөлімінде жарияланған. Өтінімді QazaqCreative бірыңғай цифрлық платформасында тіркелген қатысушылар бере алады.
Creative Shift креативті индустриядағы жобалар үшін шығармашылық пен технологияны біріктіретін жаңа мүмкіндіктердің бірі болмақ.
