2026 жылы Астанада өтетін AI & Digital Bridge халықаралық форумына 30 мыңнан астам қатысушы, 300-ден аса спикер және 100-ден астам технологиялық компания қатысады деп күтілуде, деп хабарлайды Tech-news.
Digital Bridge 2019 жылдан бері технологиялық стартаптар мен венчурлік капитал өкілдерін байланыстыратын маңызды алаңға айналды. Форум жыл сайын инвесторлар мен бизнес өкілдеріне жаңа жобалармен танысып, халықаралық технологиялық компаниялармен байланыс орнатуға мүмкіндік береді.
Бүгінде Digital Bridge өңірдегі ірі технологиялық іс-шаралардың біріне айналды. Форумдардың барлық жылдарындағы көрсеткіш бойынша оған әлемнің 100 елінен 127 мыңнан астам адам қатысқан.
Іс-шаралар аясында 1,5 мыңнан астам спикер сөз сөйлеп, 600-ден астам стартап өз жобаларын таныстырды. Сонымен қатар форумға 500-ден астам инвестор қатысты.
2026 жылғы форумда жасанды интеллект, цифрлық технологиялар, стартаптар мен венчурлік инвестициялар негізгі бағыттардың қатарында болады.
