Қазақстан Президенті Қасым-Жомарт Тоқаев қазақ тілінің цифрлық технологиялар мен жасанды интеллект саласындағы қолданысы артып келе жатқанын мәлімдеді. Оның айтуынша, соңғы жылдары халықаралық технологиялық компаниялар да қазақ тілінің әлеуетіне назар аудара бастаған, деп хабарлайды Tech-news.
Мемлекет басшысы өткен кезеңдердегі саяси қысымға қарамастан, қазақ тілінің дамуы тоқтамағанын атап өтті. Бұған әдебиет өкілдері, тіл мамандары, журналистер, зиялы қауым және қарапайым азаматтар үлес қосқан.
Қазір қазақ тілінің болашағына қауіп төніп тұрған жоқ. Керісінше, ол цифрлық ортаға бейімделіп, жаңа технологиялармен бірге дамып келеді. Еліміздегі көптеген цифрлық платформа қазақ тілінде қызмет көрсетеді.
Тоқаев халықаралық компаниялардың зерттеулерін де мысалға келтірді. OpenAI деректеріне сәйкес, қазақ тілі соңғы үш жылда жасанды интеллект жүйелерінде қолданылуы қарқынды кеңейіп келе жатқан тілдердің қатарына енген.
Ал Yandex мәліметінше, компанияның белгілі бір өнімін қазақ тілінде пайдаланатын адамдар саны өткен жылы 30%-ға өскен.
Сонымен қатар Google компаниясы 2025 жылы қазақ тілін Gemini тілдік моделіне қосты. Бұл қазақ тілінің цифрлық кеңістіктегі мүмкіндіктерін кеңейтіп, оны ғылым мен технология саласында қолдануға жол ашады.
Президенттің пікірінше, қазақ тілін заманауи технологиялармен ұштастыру бағытындағы жұмысты жүйелі түрде жалғастыру қажет.
