Қазақстандағы ең ұзын теміржол бағыты – «Маңғыстау – Семей» пойызының құрамы отандық өндірістен шыққан жаңа жолаушылар вагондарымен толықты. Енді жолаушылар сапар кезінде Wi-Fi желісіне қосылып, интернетті пайдалана алады, деп хабарлайды Tech-news.
RWS Wagon кәсіпорнында 2025–2026 жылдары шығарылған вагондар Батыс Қазақстан өңіріне жеткізілген 70-тен астам жаңа вагонның қатарына кіреді. Олар «Маңғыстау – Ақтөбе» бағытындағы №109/110 пойызының құрамын жаңартуға да пайдаланылды.
Жаңартылған №37/38 «Маңғыстау – Семей» пойызы тоғыз вагоннан тұрады. Оның төртеуі – купе, төртеуі – плацкарт және біреуі – мейрамхана вагоны. Жалпы сыйымдылығы – 331 жолаушы.
Жаңа вагондардағы басты жаңалықтардың бірі – жолаушыларға арналған Wi-Fi желісі. Бұдан бөлек, әр орынға USB-порттар мен 220 В электр розеткалары орнатылған. Бұл жолаушыларға жол үстінде смартфондарын қуаттап, электронды құрылғыларын пайдалануға мүмкіндік береді.
Вагондарда ауа температурасын реттейтін климат-бақылау жүйесі, ауаны залалсыздандыру жабдықтары және заманауи жылу оқшаулағыш материалдар қарастырылған. Сондай-ақ трансформацияланатын жатын орындар, биодәретханалар мен гипоаллергенді әрлеу материалдары қолданылады.
Қауіпсіздік үшін бейнебақылау және өрт сөндіру жүйелері орнатылған. Жолаушыларға аудиоақпарат беру, шығу есіктерін жарықтандыру, балаларды күтуге арналған жиналмалы үстелдер мен жеке сейфтер де қарастырылған.
ҚТЖ мәліметінше, вагондарды жаңарту жолаушылар тасымалының сапасын арттыруға бағытталған.
