Әлемдегі ең ірі аккумулятор өндірушілерінің бірі CATL Қазақстанда батарея шығаратын зауыт салу мүмкіндігін қарастырып жатыр. Бұл мәселе Президент Қасым-Жомарт Тоқаевтың компанияның директорлар кеңесінің теңтөрағасы Пань Цзяньмен кездесуінде талқыланды, деп хабарлайды Tech-news.
Мемлекет басшысы Contemporary Amperex Technology Co. Ltd. (CATL) компаниясының Қазақстанда аккумулятор өндірісін іске қосу бастамасын қолдады. Егер жоба жүзеге асса, бұл Орталық Азиядағы осындай деңгейдегі алғашқы кәсіпорын болмақ.
Кездесу барысында тараптар жоғары технологиялар саласындағы ұзақ мерзімді ынтымақтастықтың мүмкіндіктерін талқылады. Президент Қазақстанның тек шикізат жеткізуші емес, оны өңдеп, дайын өнім шығаратын толық өндірістік тізбек қалыптастыруға әлеуеті жеткілікті екенін айтты.
Өз кезегінде Пань Цзянь Қазақстанды CATL үшін стратегиялық серіктестердің бірі ретінде бағалайтынын жеткізді. Оның айтуынша, компания аккумулятор өндірісі мен энергия сақтау технологиялары бағытындағы бірлескен жобаларды дамытуға қызығушылық танытады.
Сонымен қатар CATL Қазақстанның 2060 жылға қарай көміртегі бейтараптығына қол жеткізу стратегиясына өз технологиялары арқылы үлес қоса алатынын мәлімдеді.
CATL – 2011 жылы құрылған қытайлық компания. Қазіргі таңда ол электромобильдерге арналған аккумуляторлар нарығының шамамен 40 пайызын иеленіп, осы сегменттегі әлемдік көшбасшы саналады.
2025 жылдың қорытындысы бойынша компанияның аккумулятор өнімдерін сату көлемі 661 ГВт·сағатқа жеткен. Осы кезеңдегі жалпы табысы 62,6 миллиард долларды, ал таза пайдасы 10,6 миллиард долларды құрады.
