Алматыда заңсыз қоқыс үйінділерімен күреске арналған TazaQala цифрлық платформасы таныстырылды. Жасанды интеллект элементтерімен жұмыс істейтін сервис тұрғындарға қоқыс төгілген орындар туралы хабарлап қана қоймай, өтініштің қаралуы мен аумақты тазарту жұмыстарының барысын онлайн бақылауға мүмкіндік береді, деп хабарлайды Tech-news.
Платформа Алматы қаласының Мамандандырылған табиғат қорғау прокуратурасының бастамасымен әл-Фараби атындағы Қазақ ұлттық университеті және «Eco Almaty» ЖШС қолдауымен әзірленген. Жоба республикалық «Таза Қазақстан» экологиялық акциясы аясында жүзеге асырылып жатыр.
Сервистің басты ерекшелігі – жасанды интеллект көмегімен заңсыз қоқыс үйінділері туралы мәліметтерді жинап, тұрғындар мен мемлекеттік органдар арасындағы байланысты жеделдетуі. Пайдаланушылар анықталған орын туралы хабарлама жіберіп, кейін өтініштің мәртебесін және тазалау жұмыстарының қалай жүріп жатқанын нақты уақыт режимінде көре алады.
Алматы қаласының мамандандырылған табиғат қорғау прокуроры Арман Нүгірбековтің айтуынша, жаңа жүйе экологиялық мәселелерді шешу процесін ашық етіп, тұрғындардың бақылауын күшейтеді. Оның сөзінше, бұл проблемалы аумақтар туралы ақпаратты жылдам алуға және оларды жою жұмыстарын тиімді үйлестіруге мүмкіндік береді.
Прокуратура келтірген мәліметке сәйкес, платформа іске қосылғалы бері қалада 871 заңсыз қоқыс үйіндісі анықталған. Соның 507-сі толық жойылып, аумақтардан 500 тоннадан астам қалдық шығарылған.
Сонымен қатар қалдықтарды басқару кезінде экологиялық талаптарды бұзғаны үшін жергілікті атқарушы органдардың бірнеше басшысы әкімшілік жауапкершілікке тартылған.
Платформаның таныстырылымынан кейін прокуратура, полиция, экология департаменті, экология және қоршаған орта басқармасы, «Eco Almaty» ЖШС мамандары, студенттер мен эко-белсенділер қатысқан рейдтік іс-шаралар өтті.
Жоба авторларының пікірінше, TazaQala заңсыз қоқыс орындарын анықтау мен жою процесін жылдам әрі ашық жүргізуге көмектеседі. Сонымен бірге қала тұрғындарын экологиялық мәселелерді шешуге белсенді тартуға және қаланың тазалығын бірлесіп бақылауға мүмкіндік береді.
