Президент Парламент депутаттарының жұмысына жоғары баға беріп, қазіргі Мәжіліс пен Сенат құрамын Қазақстанның жаңа тарихындағы ең нәтижелі шақырылымдардың бірі деп атады. Мемлекет басшысы соңғы үш жылда 300-ден астам маңызды заң қабылданғанын атап өтті, деп хабарлайды Tech-news.
Президенттің айтуынша, депутаттар ел үшін шешуші кезеңде қызмет атқарып, ауқымды реформаларды жүзеге асыруға тікелей атсалысты. Ол Парламент қабылдаған заңдардың әрқайсысы Тәуелсіз Қазақстанның болашағы үшін маңызды екенін айтып, барлық шақырылымдағы депутаттарға алғысын жеткізді.
Мемлекет басшысы қазіргі депутаттық корпустың қызметіне ерекше тоқталып, олардың ел дамуының күрделі кезеңінде жауапкершіліктен жалтармай, жүйелі өзгерістерді іске асыруға үлес қосқанын айтты.
«Тек кейінгі үш жылдың өзінде 300-ден астам өте маңызды заң қабылданды. Олардың қатарында еліміздің алдағы биік белестерінің сенімді арқауы болатын, тарихи мәні зор конституциялық заңдар мен кодекстер бар», – деп мәлімдеді.
Сөз барысында Қазақстанда экономиканы, мемлекеттік басқаруды және қоғамдық құндылықтар жүйесін қамтыған ауқымды реформалар жүргізілгені айтылды. Президент мұндай өзгерістерді жүзеге асыру үлкен жауапкершілік екенін атап өтті.
Сонымен қатар Мемлекет басшысы қазіргі жаһандық өзгерістер қарқыны мемлекеттен жаңа тәсілдер мен батыл шешімдерді талап ететінін айтты. Оның пікірінше, уақыт талабына сай әрекет ету және реформаларды жалғастыру алдағы кезеңнің негізгі міндеттерінің бірі болып қала береді.
