TikTok 2026 жылдың алғашқы тоқсанында Қазақстандағы Қауымдастық қағидаларын бұзған 1,28 миллион видеоны өшірді. Олардың басым бөлігі пайдаланушылардың шағымын күтпей-ақ жасанды интеллект көмегімен автоматты түрде анықталған, деп хабарлайды Tech-news.
TikTok 2026 жылдың қаңтар–наурыз айларына арналған Қауымдастық қағидаларының сақталуы туралы есебін жариялады. Есепке сәйкес, Қазақстанда осы кезеңде платформа талаптарына сәйкес келмейтін 1,28 миллион бейнеролик жойылған.
Компанияның мәліметінше, контенттің 99,4 пайызына ешкім шағымданбай тұрып-ақ шектеу қойылған. Ал өшірілген видеолардың 95,6 пайызы жарияланған алғашқы 24 сағаттың ішінде платформадан алынып тасталған.
Әлемдік көрсеткіш те осыған ұқсас. Бірінші тоқсанда TikTok бүкіл әлем бойынша 184 миллионнан астам видеоны жойды. Олардың көпшілігі де автоматты модерация арқылы анықталып, жарияланғаннан кейін бір тәулік ішінде өшірілген.
Биыл компания контентті бақылауда жасанды интеллектінің рөлін кеңейтті. 2026 жылдан бастап алғаш рет есепке AI автоматты түрде өшірген видеолар да енгізілді. Қазір TikTok-тағы барлық жойылған контенттің 96 пайыздан астамы дәл осы технологиялардың көмегімен анықталады.
Платформа тікелей эфирлерге қойылатын талаптарды да күшейтіп жатыр. Алғашқы тоқсанда Қауымдастық қағидаларын бұзған 50,8 миллион тікелей эфир тоқтатылды. Сонымен қатар 58,2 миллионнан астам аккаунтқа ескерту беріліп, авторлардың монетизация құралдарын пайдалануына уақытша шектеу қойылған.
Салыстыру үшін айтсақ, 2025 жылдың қорытындысында Қазақстанда ереже бұзғаны үшін 5,5 миллионнан астам бейнеролик платформадан жойылған.
