Қазақстанда мектепке дейінгі және мектеп жасындағы балаларды есепке алу процесі толық цифрландырылмақ. Жаңа ережелер 28 маусымнан бастап күшіне еніп, балалар туралы мәліметтер бірыңғай мемлекеттік дерекқорда жинақталады, деп хабарлайды Tech-news.
Қазақстанда балаларды есепке алу жүйесі жаңа форматқа өтеді. Оқу-ағарту министрінің міндетін атқарушы бекіткен қағидаларға сәйкес, енді мектепке дейінгі және мектеп жасындағы балалар туралы мәліметтер цифрлық жүйе арқылы жүргізіледі.
Жаңа тәртіптің негізгі ережелері 2026 жылғы 28 маусымнан бастап күшіне енсе, кейбір нормалар 12 шілдеде қолданысқа енгізіледі.
Жаңартылған жүйе 0 мен 18 жас аралығындағы барлық баланы қамтиды. Тіркелген мекенжайының болуына қарамастан, Қазақстанда тұрақты немесе уақытша тұратын, сондай-ақ ел аумағында уақытша жүрген балалар да есепке алынады.
Балалар туралы ақпарат бірнеше мемлекеттік ақпараттық жүйеден автоматты түрде алынады. Олардың қатарында Ұлттық білім беру деректер қоры, жеке тұлғалар туралы мемлекеттік дерекқор, қандастарды есепке алу жүйесі және жекеменшік пен техникалық-кәсіптік білім беру ұйымдарының мәліметтері бар.
Деректер жылына төрт рет — наурыз, маусым, қыркүйек және желтоқсан айларында жаңартылып отырады. Ал жаңа оқу жылы басталғанға дейін есепке алу жұмыстары 20 қыркүйекке дейін аяқталуы тиіс.
Негізгі өзгеріс — әртүрлі ведомстволардағы ақпараттың бірыңғай цифрлық базаға біріктірілуі. Бұл мектептен тыс қалған балаларды жедел анықтауға, мемлекеттік органдардағы мәліметтердің сәйкестігін тексеруге және оқушылардың сабаққа қатысуын бақылауға мүмкіндік береді.
Егер баланың мектепке бармайтыны анықталса, алдымен білім беру ұйымы ата-аналармен байланысқа шығады. Қажет болған жағдайда кәмелетке толмағандардың істері жөніндегі комиссиялар тартылады, ал ақпарат білім беру органдарына және профилактикалық есепке қою мақсатында ішкі істер органдарына жіберілуі мүмкін.
Осылайша, жаңа жүйе балалар туралы деректерді орталықтандырып қана қоймай, білім беру саласындағы бақылауды күшейтуге және түрлі мемлекеттік құрылымдардың өзара жұмысын тиімді етуге бағытталған.
Айта кетейік, бұған дейін Астанада балабақша кезегінде 47 мыңнан астам баланың тұрғаны хабарланған болатын.
