Қазақстанда дәрі-дәрмек қорын цифрлық басқару жүйесі сегіз айда 42 млрд теңгеден астам қаражатты үнемдеуге мүмкіндік берді. Жаңа механизм медициналық ұйымдардың нақты қажеттілігіне қарай препараттарды жоспарлап, артық қордың жиналуын азайтуға бағытталған, деп хабарлайды Tech-news.
Жүйе өңірлер бойынша дәрі-дәрмектің қалдығын цифрлық бақылауға көшіріп, 2026 жылғы 1 қаңтардан бастап жұмыс істей бастады. Бұл туралы Денсаулық сақтау министрі Ақмарал Әлназарова Премьер-министрдің қатысуымен өткен цифрландыру жөніндегі кеңесте мәлімдеді.
Министрдің айтуынша, сегіз айдағы үнем жылдық дәрі-дәрмек қоры көлемінің шамамен 14%-ына тең. Енді сатып алу медициналық ұйымдардың нақты сұранысы мен қолда бар қорына сүйеніп жүргізіледі.
Дәрілерді цифрлық бақылау жүйесі міндетті таңбалау енгізілген 2024 жылғы шілдеден бері шамамен 1,1 млрд қаптаманың қозғалысын тіркеді. Әр таңбаланған қаптаманы өндіруші немесе импорттаушыдан бастап медициналық ұйымға, дәріханаға және соңғы пациентке дейін бақылауға болады.
Жүйе препараттардың бағасын да талдайды. Қазір шамамен 3 мың дәрі атауының құны автоматты түрде бақыланады. Оның 52%-ында баға өзгермеген, ал 26%-ында төмендеген.
Мысалы, «Сумамед» препаратының бағасы жекелеген кезеңдерде 5 746 теңгеге дейін жеткен. 2026 жылғы тамызда оның құны 3 174 теңгеге дейін төмендеді. Бұл ең жоғары тіркелген бағамен салыстырғанда 44%-ға аз.
Цифрлық жүйе дәрілердің нақты қорын да көрсетеді. Қазір Бірыңғай дистрибьютор қоймаларында 14 млн-нан астам қаптама бар. Медициналық ұйымдарда тағы 30 млн-нан астам дәрі сақтаулы.
2027 жылғы 1 қаңтардан бастап дәрі-дәрмектің айналымын мемлекеттік бақылау тетіктерін кеңейту жоспарланып отыр. Цифрлық жүйедегі деректер препараттардың қозғалысын жедел бақылау үшін пайдаланылмақ.
2026 жылғы қыркүйектен бастап міндетті таңбалау биологиялық белсенді қоспаларға да таралады. Ал 2027 жылдан бастап бұл талапты медициналық бұйымдарға енгізу жоспарланған.
