Қазақстан халықаралық жүк тасымалын цифрландыруға арналған Smart Cargo платформасын дамытып жатыр. Президент Қасым-Жомарт Тоқаевтың айтуынша, бұл жоба кедендік рәсімдер мен логистикалық сервистерді бір цифрлық ортаға біріктіріп, Еуразиядағы жүк қозғалысын жылдамдатуға мүмкіндік береді, деп хабарлайды Tech-news.
Президент Қазақстанның Қытайды Орталық Азия, Кавказ, Таяу Шығыс және Еуропамен байланыстыратын негізгі көлік-логистика хабына айналуы елдің стратегиялық басымдығы екенін айтты.
Бүгінде Қазақстан аумағы арқылы 13 халықаралық көлік дәлізі өтеді. Ал Қытай мен Еуропа арасындағы теміржол арқылы тасымалданатын жүктердің шамамен 85 пайызы Қазақстан арқылы жеткізіледі.
Соңғы 15 жылда ел көлік және логистика инфрақұрылымын дамытуға 35 миллиард доллардан астам инвестиция салған. Осы уақыт ішінде жаңа теміржол желілері салынды, сондай-ақ Транскаспий халықаралық көлік бағыты – Орта дәліздің өткізу қабілеті кезең-кезеңімен кеңейтіліп келеді.
Тоқаевтың айтуынша, қазіргі таңда көлік дәліздерінің тиімділігі тек жол немесе теміржол сапасымен ғана өлшенбейді. Негізгі факторлар қатарында деректер алмасу жылдамдығы, жүйелердің өзара ықпалдасуы және логистикалық процестердің ашықтығы тұр.
Осы мақсатта әзірленіп жатқан Smart Cargo платформасы кедендік рәсімдерді, логистикалық қызметтерді және коммерциялық сервистерді бір жүйеге біріктіреді. Президент бұл жобаның түпкі мақсаты – Еуразияның бірыңғай цифрлық көлік кеңістігін қалыптастыру екенін атап өтті. Нәтижесінде ақпарат цифрлық желі арқылы қалай жылдам таралса, тауарлар да шекарадан дәл сондай жылдам әрі тиімді өтуі тиіс.
Мемлекет басшысы Қытайдың технологиялық компанияларын, логистика операторларын және инфрақұрылым инвесторларын осы бастамаға қатысуға шақырды.
Сонымен қатар Президент аса маңызды минералдарды игеру де Қазақстан мен халықаралық серіктестер арасындағы ынтымақтастықтың келешегі зор бағыты екенін айтты. Оның сөзінше, ел стратегиялық шикізат қоры бойынша әлемдегі жетекші мемлекеттердің бірі және қосылған құны жоғары өндірістерді дамытуға басымдық бермек.
