Қазақстанның негізгі энергия нысандары жыл соңына дейін цифрлық түгендеуден өтеді. Премьер-министр Олжас Бектенов бұл жұмысты энергетика саласындағы деректерді бір жүйеге жинақтап, нысандардың жұмысын алдын ала бақылауға мүмкіндік беретін цифрлық инфрақұрылым құрумен байланыстырып отыр, деп хабарлайды Tech-news.
Үкімет отырысында энергетика жүйесін басқаруды цифрлық алгоритмдерге көшіру мәселесі қаралды. Бұл тәсіл төтенше жағдайларға жылдам әрекет етуге, ықтимал апаттарды ертерек анықтауға және энергия нысандарының тұрақты жұмысын қамтамасыз етуге бағытталған.
Жаңа жобалар нысандардан үздіксіз телеметрия жинауды, деректерді біріктіруді және оларды талдау құралдарын енгізуді көздейді. Телеметрия арқылы жабдықтар мен жүйелердің жағдайы туралы мәліметтер нақты уақытқа жақын режимде бақылауға алынады.
«Энергия жүйесі болжамды цифрлық алгоритмдер негізінде басқару қағидатына көшуі тиіс. Бұл әртүрлі жағдайларға шұғыл әрекет етуге, апаттардың алдын алуға және энергия нысандары жұмысының сенімділігін арттыруға мүмкіндік береді», – деді Олжас Бектенов.
Осы мақсатта Энергетика министрлігіне саланың негізгі нысандары мен ақпараттық жүйелерін бірыңғай цифрлық контурға біріктіру тапсырылды. Жиналған деректер Energy Command Center-ге шығарылуы керек.
Сонымен қатар министрлік жыл соңына дейін негізгі энергия нысандарының цифрлық түгендеуін аяқтауы тиіс. Оның аясында салалық деректердің қандай құрамда болуы, олардың сапасы және жүйелер арасында берілу тәртібі бойынша бірыңғай талаптар бекітіледі.
Мұндай тәсіл энергетика саласындағы ақпаратты әртүрлі жүйелерде бөлек сақтамай, бірыңғай цифрлық ортада пайдалануға мүмкіндік береді. Нәтижесінде нысандардың жағдайын бақылау мен ықтимал ақауларға әрекет ету жеделдеуі тиіс.
