Қазақстанның Бас прокуратурасы әлеуметтік желілерде араздықты қоздыратын және жалған ақпарат тарататын контент үшін заңдық жауапкершілік күшейтілгенін ескертті. Ведомство мұндай жарияланымдар онлайн кеңістікте жиілеп отырғанын атап өтті, деп хабарлайды Tech-news.
Құқық қорғау органдарының мәліметінше, әлеуметтік желілерде қоғамда араздық тудыруға бағытталған арандатушы жазбалар мен пікірлер анықталып жатыр. Мұндай әрекеттер заңмен тыйым салынған және қатаң жазаға әкелуі мүмкін.
Қылмыстық кодекстің 174-бабына сәйкес, араздық қоздыру әрекеті үшін 2 000-нан 7 000 АЕК-ке дейін айыппұл немесе 2 жылдан 20 жылға дейін бас бостандығын шектеу не айыру жазасы қарастырылған (қылмыс ауырлығына байланысты).
Сонымен қатар, заңнамада онлайн-платформаларда заңсыз контент таратуға да шектеулер бар. Егер әрекет қылмыстық деңгейге жетпесе, Әкімшілік кодекстің 456-2-бабы бойынша 20 АЕК көлемінде айыппұл салынуы мүмкін.
Жалған ақпарат тарату да бөлек жауапкершілікке әкеледі. ӘҚБтК аясында әкімшілік жаза, ал Қылмыстық кодекстің 274-бабы бойынша көрінеу жалған ақпарат таратқан жағдайда қылмыстық жауапкершілік қарастырылған.
Бас прокуратура азаматтарды ақпаратты жарияламас бұрын оның шынайылығын тексеруге, арандатушылық сипаттағы контентті таратпауға және әлеуметтік желілерде жауапкершілікпен әрекет етуге шақырды.
Ведомствоның айтуынша, мұндай шаралар цифрлық кеңістіктегі тұрақтылықты сақтау және қоғамдық келісімді қорғау мақсатында қабылданып отыр.
