eGov Mobile қосымшасында «Құқық және тәртіп» бөлімі жаңарып, мемлекеттік және құқық қорғау қызметтері бір жерге жинақталды. Енді пайдаланушылар полицияға арыз беріп, жеке деректерінің таралып кетуін тексеріп, айыппұлдар мен басқа да цифрлық қызметтерге қол жеткізе алады, деп хабарлайды Tech-news.
Жаңарту «Ұлттық ақпараттық технологиялар» АҚ, Бас прокуратура және Ішкі істер министрлігінің бірлескен жұмысы нәтижесінде іске асырылды.
Жаңартылған «Құқық және тәртіп» бөлімі үш негізгі бағытты қамтиды: мемлекеттік қызметтер, азаматтардың қауіпсіздігіне арналған цифрлық шешімдер және Бас прокуратураның ақпараттық ресурстары.
Пайдаланушыларға қолжетімді негізгі сервистер:
- «102» — полицияға оқиғалар, тұрмыстық зорлық-зомбылық, жол-көлік оқиғалары және жол қозғалысы ережелерінің бұзылуы туралы хабарлама жіберуге арналған.
- Nomad Guard — жеке деректердің таралып кетуін тексеруге мүмкіндік береді.
- Naqty Өнім — тауардың таңбалануын тексеруге арналған.
- Несие мен микронесиеден бас тарту — азаматтарға несие рәсімдеуге шектеу қоюға мүмкіндік беретін цифрлық қызмет.
- Әкімшілік айыппұлдарды іздеу және төлеу.
- Соттылық туралы анықтама алу.
- Шетелге шығуға тыйым салынғанын тексеру.
Бұған дейін аталған қызметтердің бір бөлігі eGov Mobile-дың «Қызметтер» бөлімінде орналасқан. Енді олар жаңартылған «Құқық және тәртіп» бөлімінен де қолжетімді.
«Ұлттық ақпараттық технологиялар» АҚ басқарма төрағасы Дәулет Бекмановтың айтуынша, «Құқықтық тәртіп» қызметі 2025 жылғы маусымда іске қосылғалы бері шамамен 1,4 миллион рет пайдаланылған.
«ҰАТ командасы цифрлық және мемлекеттік қызметтерді жақсарту, оларды ыңғайлырақ, қолжетімдірек және азаматтардың қажеттіліктеріне бағытталған ету үшін үнемі жұмыс істейді», — деді ол.
Компания өкілінің сөзінше, жаңа жаңарту мемлекеттік қызметтерді бір ортаға жинақтап, азаматтардың қажетті ақпарат пен сервистерді табуын жеңілдетуге бағытталған.
Жаңартылған бөлімде Қазақстан Республикасы Бас прокуратурасының ақпараттық материалдары мен цифрлық қызметтері де бар.
Олардың қатарында:
- Құқықтық статистика туралы ақпарат.
- Жоғалған адамдарды іздеу қызметі.
- Құқық бұзушылық туралы есептің тіркелуін тексеру құралы.
- Құқық қорғау саласына қатысты басқа да ақпараттық ресурстар.
Жоба Қазақстан Республикасының Ішкі істер министрлігі, Жасанды интеллект және цифрлық даму министрлігінің Мемлекеттік қызметтер комитеті, «Ұлттық ақпараттық технологиялар» АҚ және Бас прокуратураның қатысуымен жүзеге асырылды.
Жаңарту «Құқықтық тәртіп» қағидатын дамытуға бағытталған мемлекеттік саясаттың цифрлық жалғасы ретінде ұсынылып отыр.
