Қазақстан Премьер-министрі Олжас Бектенов Presight AI бас директоры Томас Прамотедхаммен кездесіп, жасанды интеллект пен цифрлық инфрақұрылымды дамыту мәселелерін талқылады. Тараптар Smart City жобалары, көлік жүйелерін цифрландыру және деректерді сақтау мен өңдеу инфрақұрылымын дамытуға басымдық берді, деп хабарлайды Tech-news.
Presight AI халықаралық G42 тобының құрамына кіреді. Компания жасанды интеллект пен үлкен деректерді талдау негізінде қолданбалы технологиялық шешімдер әзірлейді. Қазақстанда оның қатысуымен Астанада Smart City жобасы іске қосылып, Alem.Cloud ұлттық суперкомпьютерлік инфрақұрылымы құрылған.
Кездесуде көлік саласына жаңа цифрлық шешімдерді енгізу және Астана халықаралық әуежайының интеллектуалды инфрақұрылымын дамыту перспективалары да қаралды. ЖИ технологияларын қаланы басқару тиімділігін арттыруға, цифрлық сервистердің қауіпсіздігі мен сапасын жақсартуға және жергілікті IT мамандардың тәжірибесін дамытуға пайдалану мүмкіндіктері сөз болды.
Олжас Бектенов Қазақстанның цифрлық трансформацияның жаңа кезеңіне өткенін атап өтті. Мемлекет басшысы Қасым-Жомарт Тоқаев 2026 жылды Цифрландыру және жасанды интеллект жылы деп жариялаған. Үкімет ұзақмерзімді технологиялық инвестицияларды тарту үшін инвесторларға мемлекеттік қолдау, салықтық және кедендік преференциялар ұсынуда. Сондай-ақ Altyn Visa арнайы визалық режимі енгізіліп, жобаларды сүйемелдеу «бір терезе» қағидаты бойынша жүргізіледі.
Өз кезегінде Томас Прамотедхам Presight AI компаниясының Қазақстандағы жұмысын кеңейтіп, жаңа бірлескен жобаларға қатысуға дайын екенін жеткізді. Компания қолданбалы ЖИ, цифрлық инфрақұрылым және экономиканың негізгі салаларына технологиялық шешімдер енгізу бағыттарындағы серіктестікті жалғастырмақ.
Кездесу соңында Қазақстан мен Presight AI арасындағы ынтымақтастықтың алдағы басым бағыттары белгіленді.
