Қазақстан жасанды интеллект инфрақұрылымын дамыту қарқынын үдетіп келеді. Ел бірден әлемдегі ең қуатты суперкомпьютерлердің TOP500 рейтингінде екі жүйесін тіркеп, AI бағытындағы халықаралық позициясын нығайтты, деп хабарлайды Tech-news.
Үкіметтің мәліметінше, халықаралық бағалаулар Қазақстанның AI саласындағы ілгерілеуін растап отыр. OpenAI жүргізген талдау бойынша, Қазақстан Орталық Азиядағы жасанды интеллектіні енгізу деңгейі ең жоғары ел атанды. Рейтингте Қырғызстан 52-орында, Өзбекстан 58-орында тұр.
Ал Dealroom бағалауына сәйкес, Қазақстанның IT-экожүйесі әлемдегі ең қарқынды дамып келе жатқан Rising Stars санатындағы үздік он экожүйенің қатарына енді.
Соңғы бес жылда Astana Hub резиденттері жалпы 4,9 млрд доллар табыс тапқан. Осы кезеңде экожүйеге тартылған инвестиция көлемі 910 млн доллардан асты.
2025 жылғы негізгі жобалардың бірі — ұлттық есептеу инфрақұрылымының іске қосылуы болды. «Ұлттық ақпараттық технологиялар» АҚ базасында құрылған Alem.Cloud суперкомпьютерлік кластері әлемдегі ең қуатты есептеу жүйелерін біріктіретін TOP500 рейтингінде 104-орынға жайғасты.
Жүйе 64 HPE Cray сервері мен жаңа буындағы NVIDIA H200 графикалық үдеткіштеріне негізделген. Оның есептеу өнімділігі шамамен 2 экзафлопқа жетеді. Мұндай қуат ірі тілдік модельдерді оқытуға, ғылыми есептеулер жүргізуге және күрделі AI сервистерін дамытуға мүмкіндік береді.
Сонымен қатар Қазақтелекомның коммерциялық суперкомпьютері де TOP500 тізіміне еніп, 122-орынды иеленді. Үкіметтің мәліметінше, бұл есептеу ресурстары мемлекеттік органдардың цифрлық жобалары мен жасанды интеллект шешімдерін дамытуға пайдаланылады.
Биыл Қазақстан тағы бір ауқымды жобаға кірісті. Елде қуаты кемінде 1 ГВт болатын халықаралық деңгейдегі AI-инфрақұрылым — «Деректер орталықтарының алқабы» салынады. Жоба аясында жасанды интеллект пен цифрлық инфрақұрылымды дамытуға бағытталған жалпы құны 10 млрд доллар болатын келісімдер жасалды.
Келіссөздерге NVIDIA компаниясының вице-президенті Рев Лебаредян және Firebird компаниясының негізін қалаушылар Раза Мовакимян мен Армен Есаян қатысты.
Сондай-ақ Жасанды интеллект және цифрлық даму министрлігі мен Firebird арасында Alem.ai платформасы негізінде Firebird Labs Kazakhstan зерттеу орталығын құру туралы келісімге қол қойылды. Бұдан бөлек, «КТ-ТЕЛЕКОМ» мен Firebird «Деректер орталықтарының алқабы» жобасы бойынша ынтымақтастықты бастайды.
