Қазақстанда азаматтарға жұмыс іздеудің қажеті болмайтын жаңа цифрлық жұмыспен қамту қызметі енгізіліп жатыр. Жүйе жасанды интеллект арқылы адамның тәжірибесі мен жеке ерекшеліктерін ескеріп, оған сәйкес бос жұмыс орындарын автоматты түрде ұсынады, деп хабарлайды Tech-news.
Жаңа модельдің негізгі идеясы — азаматтың өзі жұмыс іздеуі емес, жүйенің оған лайықты вакансияны ұсынуы.
Сервис алдымен жұмыс берушілердің өтінімдерін талдап, жұмысқа мұқтаж азаматтарды анықтайды. Одан кейін оларға eGov және Enbek.kz мобильді қосымшалары арқылы хабарлама жіберіледі. Кей жағдайда ұсыныстар 1414 нөмірінен SMS түрінде де келеді.
Жасанды интеллект азаматтың білімі, тәжірибесі және басқа да жеке ерекшеліктерін ескеріп, оған ең қолайлы жұмыс орындарын іріктейді. Іздеу тек адамның тұратын өңірімен шектелмейді: жүйе Қазақстанның басқа аймақтарындағы, қажет болған жағдайда шетелдегі вакансияларды да ұсына алады.
Егер азаматқа қосымша дағды қажет болса, сервис оқыту немесе қайта даярлау курстарын ұсынады. Сондай-ақ басқа өңірге қоныс аудару мүмкіндігі туралы ақпарат береді. Осылайша жүйе тек вакансия көрсетіп қоймай, азаматты тұрақты жұмысқа орналасқанға дейін сүйемелдеуге бағытталған.
Сервис шілде айында Павлодар облысында іске қосылды. Осы уақыт ішінде жұмысқа орналасу мүмкіндіктері туралы 39 мың SMS-хабарлама жіберіліп, 962 адам жұмысқа орналасты.
Келесі кезеңде цифрлық қызметті қыркүйек айында Маңғыстау облысында іске қосу жоспарланған. Жыл соңына дейін сервис Қазақстанның барлық 20 өңіріне енгізілуі тиіс.
Қызметтің тағы бір нұсқасы азаматтарға Aitu мобильді қосымшасы арқылы қолжетімді болады.
