Google кескін жасау және өңдеуге арналған жаңа Pics сервисін таныстырды. Қызмет пайдаланушыларға AI көмегімен суреттерді жасап қана қоймай, дайын кескіннің жекелеген бөліктерін жеке өңдеуге мүмкіндік береді, деп хабарлайды Tech-news.
Pics арқылы суретті мәтіндік сипаттама бойынша жасауға немесе компьютерден, Google Drive және Google Photos сервистерінен дайын файлды жүктеуге болады.
Қызметтің басты ерекшелігі — кескінді толықтай қайта өңдемей, оның нақты элементтерімен жұмыс істеу мүмкіндігі. Мысалы, пайдаланушы фотодағы орындықты басқа жерге жылжыта алады немесе оны толығымен алып тастайды.
AI суреттегі жеке нысандарды автоматты түрде анықтап, оларды бөлек өңдеуге мүмкіндік береді. Бұл тәсіл дәстүрлі генеративті редакторлардағы бір ғана сұраныспен бүкіл кескінді өзгерту қағидатынан өзгеше.
Pics мәтінмен де жұмыс істей алады. Пайдаланушы сурет немесе плакат ішіндегі белгілі бір жазуды таңдап, оны өзгерте, қайта жаза немесе басқа тілге аудара алады. Бұл кезде кескіннің қалған бөлігіне әсер етпейді.
Сонымен қатар сервис дайын суреттердің сапасын 2K және 4K ажыратымдылығына дейін арттыруға мүмкіндік береді.
Google Pics-ті Workspace экожүйесіне біріктіріп отыр. Қызмет Docs және Slides-пен жұмыс істейді, Drive арқылы синхрондалады және бірнеше пайдаланушыға бір суретті бірлесіп өңдеуге жағдай жасайды.
Жаңа құрал әсіресе презентация, құжат, маркетингтік материал және визуалды контент дайындайтын Workspace пайдаланушыларына бағытталған.
