Қазақстанда азаматтардың цифрлық қауіпсіздігін күшейтуге бағытталған жаңа талаптар енгізіледі. Үкімет отырысында мемлекеттік дерекқорларды қорғау, телефон алаяқтығына қарсы күрес және биометриялық сәйкестендіруді дипфейктерден қорғау мәселелері талқыланды, деп хабарлайды Tech-news.
Премьер-министр Олжас Бектенов цифрлық ортада дербес деректердің қауіпсіздігіне ерекше назар аударып, бұл бағытта қатаң бақылау қажет екенін айтты.
Үкімет отырысында Премьер-министрдің орынбасары – жасанды интеллект және цифрландыру министрі Жаслан Мәдиев киберқауіпсіздікті күшейту бойынша атқарылып жатқан жұмыстарды таныстырды.
Жаңа заңнамалық талаптар мемлекеттік дерекқорлармен жұмыс істеу тәртібін күшейтуді көздейді. Сонымен қатар телефон арқылы жасалатын алаяқтықпен күреске қосымша шаралар енгізіліп, биометриялық сәйкестендіру жүйелері дипфейктерден қорғалмақ.
Бұл әсіресе адамның бет-бейнесі немесе басқа биометриялық белгілері жасанды түрде қолданылатын алаяқтық сценарийлердің алдын алуға бағытталған.
Мемлекеттік ақпараттық жүйелердің жұмысы тәулік бойы бақыланады. Ал eGov платформасында азаматтар өздерінің дербес деректеріне кім және қандай жағдайда сұрау жасағанын бақылау мүмкіндігіне ие.
Дербес деректерді қорғау шаралары телекоммуникация нарығын және деректерді өңдеу орталықтарын дамытуға қатысты заңнамалық өзгерістермен қатар іске асырылмақ.
